ٹیسلا سائبر ٹرک کے دو ماڈلز 5 ہزار ڈالر تک مہنگے

امریکی الیکٹرک گاڑیاں بنانے والی کمپنی ٹیسلا نے اپنے مشہور سائبر ٹرک کے دو ماڈلز کی قیمتوں میں 5 ہزار ڈالر تک اضافہ کردیا، جس کے بعد امریکا میں ان گاڑیوں کی نئی قیمتیں مقرر کردی گئی ہیں۔

غیر ملکی خبر رساں ادارے کے مطابق ٹیسلا نے سائبر ٹرک کے ڈوئل موٹر اور پریمیم آل وہیل ڈرائیو ماڈلز کی قیمتوں میں اضافہ کیا ہے۔ کمپنی کی ویب سائٹ پر موجود نئی قیمتوں سے بھی اس اضافے کی تصدیق ہوگئی ہے۔

قیمتوں میں اضافے کے بعد سائبر ٹرک کے ڈوئل موٹر ماڈل کی قیمت 74,990 ڈالر جبکہ پریمیم آل وہیل ڈرائیو ماڈل کی قیمت 84,990 ڈالر ہوگئی ہے۔

دونوں ماڈلز کی قیمت میں سابقہ قیمت کے مقابلے میں 5 ہزار ڈالر کا اضافہ کیا گیا ہے، جس کے بعد ممکنہ خریداروں کے لیے ٹیسلا سائبر ٹرک کی خریداری مزید مہنگی ہوگئی ہے۔

ٹیسلا سائبر ٹرک اپنے منفرد اور مستقبل کے طرز کے ڈیزائن کے باعث عالمی سطح پر خاصی توجہ حاصل کرچکا ہے۔ یہ گاڑی کمپنی کی الیکٹرک پک اپ ٹرک کیٹیگری میں اہم ماڈل سمجھی جاتی ہے۔

رپورٹ کے مطابق ٹیسلا نے قیمتوں میں اضافے کی فوری وجہ واضح نہیں کی۔ تاہم نئی قیمتیں امریکا میں سائبر ٹرک کے مذکورہ دونوں ماڈلز کے لیے نافذ کردی گئی ہیں۔