لارڈز ٹیسٹ: انگلینڈ کی 357 رنز کی برتری، پاکستان کے لیے میچ بچانا مشکل ہو گیا

لارڈز ٹیسٹ کے بارش سے متاثرہ تیسرے روز ڈین لارنس کی شاندار ناقابلِ شکست نصف سنچری کی بدولت انگلینڈ نے پاکستان کے خلاف دوسری اننگز میں 177 رنز بنا کر 357 رنز کی بھاری برتری حاصل کر لی۔

لارڈز کے تاریخی میدان پر پاکستان اور انگلینڈ کے درمیان کھیلے جا رہے دوسرے ٹیسٹ میچ کا تیسرا روز شدید بارش اور خراب روشنی کی نذر ہو گیا، تاہم ڈین لارنس کی شاندار اور جارحانہ بیٹنگ کی بدولت انگلینڈ نے میچ پر اپنی گرفت انتہائی مضبوط کر لی ہے۔

پہلی اننگز میں 290 رنز بنانے کے بعد انگلینڈ نے پاکستان کی پوری ٹیم کو صرف 110 رنز پر ڈھیر کر دیا تھا، جس کے بعد تیسرے دن کے اختتام پر انگلینڈ نے اپنی دوسری اننگز میں 7 وکٹوں کے نقصان پر 177 رنز بنا لیے ہیں اور اسے مجموعی طور پر 357 رنز کی بھاری برتری حاصل ہو چکی ہے۔

تیسرے روز کا کھیل بارش کی وجہ سے دوپہر 2 بجکر 20 منٹ پر شروع ہوا۔ انگلینڈ نے اپنی دوسری اننگز 81 رنز 3 کھلاڑی آؤٹ سے آگے بڑھائی۔

یہ بھی پڑھیں : پمز نرسری آتشزدگی رپورٹ پبلک، وزیر اعظم نے ایگزیکٹو ڈائریکٹر سمیت 8 اعلیٰ افسران معطل کردیئے

پاکستانی فاسٹ باؤلر محمد عباس نے مشکل پچ کا بھرپور فائدہ اٹھایا اور دن کی دسویں ہی گیند پر ایمیلیو گے کو محض 30 کے انفرادی اسکور پر ایل بی ڈبلیو کر دیا۔

اس کے بعد محمد عباس نے ہری بروک اور پہلی اننگز میں نمایاں اسکور کرنے والے جیمی اسمتھ کو بھی اپنے سحر انگیز اسپل میں آؤٹ کر کے پاکستان کو کامیابی دلائی۔ محمد عباس نے 48 رنز دے کر 3 وکٹیں حاصل کیں۔

تاہم ڈین لارنس نے ایک اور ہی انداز اپنایا اور پاکستانی باؤلنگ اٹیک پر سخت جوابی حملہ کیا۔ انہوں نے خرم شہزاد کو لگاتار 2 چوکے لگائے اور پھر محمد علی کو ایک چوک اور ایک شاندار چھکا جڑ دیا۔

لارنس نے انتہائی دباؤ اور رک رک کر ہونے والی بارش کے باوجود صبر اور مہارت کا مظاہرہ کرتے ہوئے علی عثمان کو مڈ وکٹ پر چھکا لگا کر اور پھر محمد علی کی گیند پر سنگل لے کر اپنی چھٹی ٹیسٹ نصف سنچری مکمل کی۔ ڈین لارنس 50 رنز پر ناٹ آؤٹ ہیں۔

شام کو 6 بجکر 30 منٹ پر خراب روشنی کے باعث کھیل ختم کرنے کا اعلان کر دیا گیا، حالانکہ اس وقت مزید ایک گھنٹے کا کھیل ممکن تھا اور بادلوں کے درمیان سے دھوپ بھی نکل آئی تھی۔

دو سال بعد قومی ٹیم میں واپسی کرنے والے ڈین لارنس کی یہ اننگز انگلینڈ کے لیے انتہائی اہمیت کی حامل ہے کیونکہ بین اسٹوکس کی ریٹائرمنٹ کے بعد نمبر 6 کی پوزیشن کے لیے وہ ایک بہترین آل راؤنڈر کے طور پر سامنے آئے ہیں۔ پاکستان کے لیے اب اس میچ میں واپسی انتہائی دشوار دکھائی دے رہی ہے۔