گنج پن کے علاج میں اہم پیش رفت، نئی دوا سے بالوں کی دوبارہ نشوونما کے حوصلہ افزا نتائج

دنیا بھر میں گنج پن سے متاثر افراد کے لیے ایک نئی تحقیق امید کی کرن بن گئی ہے۔

سائنسدانوں نے ایسی دوا کے حوصلہ افزا نتائج دریافت کیے ہیں جو بنیادی طور پر جوڑوں کی بعض بیماریوں کے علاج کے لیے استعمال کی جاتی ہے۔

جرنل JAMA Dermatology میں شائع ہونے والی تحقیق کے مطابق ایلوپیشیا ایریاٹا کے مریضوں میں upadacitinib نامی دوا کے استعمال سے بالوں کی دوبارہ نشوونما میں نمایاں بہتری دیکھی گئی ہے۔

ایلوپیشیا ایریاٹا ایک خودکار مدافعتی بیماری ہے، جس میں جسم کا مدافعتی نظام غلطی سے بالوں کی جڑوں کو متاثر کرنے لگتا ہے۔ اس بیماری کے نتیجے میں سر یا جسم کے دیگر حصوں سے بال عموماً گول شکل میں جھڑنے لگتے ہیں، جبکہ بعض مریضوں میں بالوں کا بڑے پیمانے پر نقصان بھی ہوسکتا ہے۔

تحقیق میں شمالی امریکا، یورپ اور چین سے ایسے مریضوں کو شامل کیا گیا جن کے سر کے بڑے حصے سے بال جھڑ چکے تھے۔ دو الگ کلینیکل ٹرائلز کے دوران شرکا کو مختلف گروپس میں تقسیم کیا گیا۔

شرکا کو روزانہ 15 ملی گرام یا 30 ملی گرام upadacitinib دی گئی، جبکہ ایک گروپ کو پلیسبو فراہم کیا گیا۔ محققین نے 24 ہفتوں کے دوران مریضوں میں بالوں کی دوبارہ نشوونما کا جائزہ لیا۔

تحقیق کے نتائج میں دوا استعمال کرنے والے مریضوں میں بالوں کی نشوونما میں نمایاں بہتری دیکھی گئی۔ بعض مریضوں میں بالوں کی تقریباً مکمل واپسی کے نتائج بھی سامنے آئے، جسے محققین نے حوصلہ افزا پیش رفت قرار دیا ہے۔

محققین کے مطابق upadacitinib مدافعتی نظام کے ان سگنلز کو روکنے میں مدد دیتی ہے جو جسم میں سوزش پیدا کرتے ہیں۔ یہ سگنلز بالوں کی جڑوں پر مدافعتی نظام کے حملے میں بھی کردار ادا کرتے ہیں۔

تحقیق کے مطابق ان مدافعتی سگنلز کو روکنے سے بالوں کی جڑوں کو دوبارہ فعال ہونے اور بالوں کی نشوونما میں مدد مل سکتی ہے۔ تاہم اس حوالے سے مزید شواہد اور طویل مدتی تحقیق کی ضرورت ہے۔

ماہرین نے واضح کیا ہے کہ تحقیق کے نتائج حوصلہ افزا ضرور ہیں، لیکن انہیں گنج پن کی ہر قسم کے علاج کے طور پر نہیں دیکھا جاسکتا۔ ایلوپیشیا ایریاٹا گنج پن کی ایک مخصوص قسم ہے اور ہر شخص میں بال جھڑنے کی وجہ مختلف ہوسکتی ہے۔

ماہرین کے مطابق یہ جاننا بھی ضروری ہے کہ دوا کے ذریعے حاصل ہونے والی بالوں کی نشوونما طویل عرصے تک برقرار رہتی ہے یا نہیں۔ اس کے علاوہ طویل مدت تک دوا کے استعمال سے سامنے آنے والے ممکنہ مضر اثرات کا جائزہ لینا بھی ضروری ہوگا۔

محققین کا کہنا ہے کہ موجودہ نتائج اگرچہ ابتدائی نوعیت کے ہیں، تاہم یہ ایلوپیشیا ایریاٹا سے متاثر افراد کے لیے مستقبل کے علاج کے حوالے سے ایک اہم امید پیدا کرتے ہیں۔

طبی ماہرین نے خبردار کیا ہے کہ کسی بھی دوا کا استعمال خود سے شروع نہیں کرنا چاہیے۔ بالوں کے جھڑنے کی وجہ جاننے اور مناسب علاج کے لیے مستند ماہر ڈاکٹر سے مشورہ کرنا ضروری ہے۔