امریکہ اور ایران کے تازہ حملوں کے بعد خام تیل کی قیمتوں میں اضافہ

امریکہ اور ایران کے درمیان ہونے والی حالیہ عسکری جھڑپوں اور حملوں کے بعد عالمی منڈی میں خام تیل کی قیمتوں میں اضافہ ہو گیا۔

امریکہ اور ایران کے درمیان مشرق وسطیٰ میں شروع ہونے والے شدید فوجی تصادم اور ایک دوسرے کے خلاف کیے جانے والے حملوں کے بعد عالمی معیشت اور خصوصاً توانائی کی مارکیٹ پر برے اثرات مرتب ہونا شروع ہو گئے ہیں۔

عالمی منڈی میں کاروبار کے ابتدائی اوقات ہی میں خام تیل کی قیمتوں میں تقریباً ایک فیصد کا نیا اضافہ دیکھا گیا ہے، جس سے ایندھن کی فراہمی میں تعطل پیدا ہونے کے خدشات گہرے ہو گئے ہیں۔

تازہ ترین اعداد و شمار کے مطابق عالمی معیار کے برینٹ کروڈ فیوچرز کی قیمت 87 سینٹ یعنی 0.92 فیصد اضافے کے بعد 95.52 ڈالر فی بیرل تک پہنچ گئی ہے۔

یہ بھی پڑھیں : ایران کا اردن، بحرین اور عراق میں امریکی اڈوں پر جوابی حملہ، درجنوں امریکی اہلکار ہلاک کرنے کا دعویٰ

اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت میں بھی 80 سینٹ یعنی 0.89 فیصد کا اضافہ ریکارڈ کیا گیا ہے، جس کے بعد اس کی قیمت 91.02 ڈالر فی بیرل ہو گئی ہے۔

معاشی ماہرین کے مطابق دونوں خام تیل کے معاہدوں میں پچھلے تجارتی سیشن کے دوران ہی 4 ڈالر فی بیرل سے زیادہ کا اضافہ ہوا تھا، جو کہ جولائی کے بعد سے اب تک کا سب سے بڑا ایک روزہ اضافہ ہے۔

خلیجی خطے اور خاص طور پر آبنائے ہرمز کے قریب فوجی سرگرمیوں کے باعث عالمی منڈی میں تیل کی محفوظ فراہمی کے حوالے سے شدید تشویش پائی جا رہی ہے، جس سے آنے والے دنوں میں قیمتوں میں مزید اضافے کا امکان رد نہیں کیا جا سکتا۔