جی سیون وزرائے خارجہ کا ایران سے حوثیوں کو عسکری امداد بند کرنے کا مطالبہ

جی سیون ممالک کے وزرائے خارجہ نے ایران پر سخت الفاظ میں زور دیا ہے کہ وہ یمن میں حوثی فورسز کی تمام عسکری حمایت فوری طور پر بند کر دے۔

اقوام متحدہ کی جنرل اسمبلی کے اجلاس کے موقع پر منعقدہ ایک اہم سائیڈ لائن بیٹھک کے بعد برطانیہ، کینیڈا، فرانس، جرمنی، اٹلی، جاپان اور امریکا (جی سیون) کے وزرائے خارجہ نے ایک مشترکہ اور سخت اعلامیہ جاری کیا ہے۔

اس بیان میں حوثی ملیشیا کی طرف سے یمن کے اندر اور سعودی عرب کے خلاف مسلسل کیے جانے والے میزائل اور ڈرون حملوں کی شدید الفاظ میں مذمت کی گئی ہے۔

یہ بھی پڑھیں : برطانیہ کا سعودی عرب کو حوثی حملوں کے خلاف دفاعی فوجی مدد فراہم کرنے کا اعلان

وزرائے خارجہ نے کہا ہے کہ ایران کی طرف سے حوثی ملیشیا کو فراہم کی جانے والی عسکری اور دفاعی امداد ایک انتہائی خطرناک اور مسلسل کشیدگی بڑھانے والا عمل ہے، جو نہ صرف خطے کے امن کو داؤ پر لگا رہا ہے بلکہ عالمی تجارت اور عالمی معاشی استحکام کو بھی شدید خطرات سے دوچار کر رہا ہے۔

جی سیون کے وزراء نے حوثیوں سے پرزور مطالبہ کیا ہے کہ وہ فوری طور پر اپنی تمام عسکری کارروائیاں، سویلین جہاز رانی پر حملے اور دھمکیاں بند کریں اور مخلصانہ طریقے سے سیاسی مذاکرات کے عمل کی طرف واپس آئیں۔