امریکا کی چین کے ساتھ مصنوعی ذہانت کے امور پر اے آئی ہاٹ لائن قائم کرنے کی تجویز

امریکا نے مصنوعی ذہانت کے شعبے میں ممکنہ سنگین سکیورٹی خطرات سے نمٹنے کے لیے چین کے ساتھ براہِ راست معلومات کے تبادلے کی غرض سے ایک نئی اے آئی ہاٹ لائن قائم کرنے کی تجویز پیش کی ہے۔

واشنگٹن اور بیجنگ کے تعلقات میں ایک نئے باب کا آغاز کرتے ہوئے امریکا نے یہ تجویز دی ہے کہ مصنوعی ذہانت (اے آئی) سے متعلق کسی بھی ممکنہ ہنگامی صورتحال یا سنگین حادثے کی صورت میں دونوں ممالک کے مابین براہِ راست رابطہ کاری اور معلومات کی ترسیل کے لیے ایک نیا نوٹیفکیشن میکانزم یا اے آئی ہاٹ لائن قائم کی جائے۔

یہ اہم تجویز امریکی صدر ڈونلڈ ٹرمپ اور چینی صدر شی جن پنگ کے درمیان واشنگٹن میں رواں ہفتے طے شدہ اعلیٰ سطح کی ملاقات سے قبل سامنے آئی ہے۔

یہ بھی پڑھیں : مصنوعی ذہانت پر پابندی لگائی تو چین سے پیچھے رہ جائیں گے، امریکی اسپیکر

امریکی وزیر خزانہ اسکاٹ بیسنٹ اور چینی نائب وزیر اعظم حے لی فنگ کے درمیان نیویارک میں ہونے والے مذاکرات کے دوران بھی مصنوعی ذہانت، تجارت اور دیگر سٹریٹجک امور پر تفصیلی بات چیت ہوئی۔

امریکی انتظامیہ کا ماننا ہے کہ دنیا کی دو بڑی اے آئی طاقتوں کے درمیان شفافیت کا ہونا انتہائی ضروری ہے، خاص طور پر ایسے معاملات میں جہاں دونوں ملکوں کو مشترکہ تکنیکی یا سکیورٹی خطرات کا سامنا ہو۔

چین کی طرف سے تاحال اس تجویز پر محتاط ردعمل سامنے آیا ہے جبکہ چینی سرکاری ذرائع نے مذاکرات کو تعمیری قرار دیا ہے اور اس بات پر بحث جاری ہے کہ دونوں ممالک اس مسابقت اور خطرات سے کیسے نمٹیں گے۔