آسٹریلیا جانے والے ہنرمند افراد کیلئے اہم تبدیلی، ویزا درخواستوں کی ترجیحی ترتیب تبدیل

آسٹریلیا جانے کے خواہشمند ہنرمند افراد کے لیے ویزا درخواستوں کی پروسیسنگ میں اہم تبدیلی کردی گئی ہے، جس کے تحت اب تمام درخواستوں کو ایک ہی ترتیب سے پراسیس نہیں کیا جائے گا۔

نئی پالیسی کے مطابق درخواستوں کی ترجیح امیدوار کے شعبے، درخواست جمع کراتے وقت اس کی موجودگی اور ویزا کی مخصوص کیٹیگری کو مدنظر رکھتے ہوئے طے کی جائے گی۔

یہ تبدیلی 19 ستمبر 2026 سے نافذ ہوئی ہے اور اس کا اطلاق صرف نئی درخواستوں تک محدود نہیں ہوگا بلکہ پہلے سے جمع کرائی گئی زیرِ التوا درخواستیں بھی نئی ترجیحی ترتیب کے تحت دیکھی جائیں گی۔

عارضی ہنرمند ویزوں میں تعمیرات، صحت، تدریس، زراعت، آبی زراعت، ماہی گیری اور وسائل سے متعلق شعبوں کی درخواستوں کو ترجیح دی جائے گی۔

اسی ترجیحی فہرست میں آسٹریلیا کے قانون نافذ کرنے والے اداروں اور دفاعی مفادات سے متعلق درخواستیں بھی شامل ہوں گی۔

ان شعبوں کے بعد اسکلز اِن ڈیمانڈ ویزا سب کلاس 482 کے اسپیشلسٹ اسکلز اسٹریم کی درخواستوں کو ترجیح دی جائے گی۔ اس طرح درخواست گزار کا پیشہ اور ویزا کیٹیگری اس بات کا تعین کرنے میں اہم کردار ادا کرے گی کہ اس کی درخواست کب پراسیس کی جائے گی۔

آسٹریلیا میں موجود درخواست گزاروں کو ترجیح

نئی پالیسی میں درخواست جمع کراتے وقت امیدوار کی موجودگی کو بھی اہمیت دی گئی ہے۔ آسٹریلیا میں موجود افراد کی درخواستیں ان درخواست گزاروں سے پہلے پراسیس کی جائیں گی جو درخواست کے وقت آسٹریلیا سے باہر ہوں گے۔

مستقل ہنرمند ویزوں کیلئے بھی نئی ترجیحی ترتیب

نئی پروسیسنگ ترجیحات کا دائرہ مستقل ہنرمند ویزا درخواستوں تک بھی بڑھایا گیا ہے۔

مستقل ویزوں میں بھی تعمیرات، صحت، تدریس، زراعت، آبی زراعت، ماہی گیری اور وسائل سے متعلق شعبوں کو ترجیح حاصل ہوگی، جبکہ قانون نافذ کرنے والے اداروں اور آسٹریلیا کے دفاعی مفادات سے متعلق درخواستیں بھی ترجیحی فہرست میں شامل رہیں گی۔

اس کے بعد آسٹریلیا میں موجود امیدواروں کی جانب سے جمع کرائی گئی درخواستیں دیکھی جائیں گی، جبکہ بیرونِ ملک موجود مرکزی درخواست گزاروں کی درخواستیں بعد میں پراسیس ہوں گی۔

ویزا حاصل کرنے کی اہلیت میں تبدیلی نہیں

نئے قواعد کے تحت ویزا حاصل کرنے کی بنیادی اہلیت میں کوئی تبدیلی نہیں کی گئی، بلکہ بنیادی طور پر درخواستوں کی پروسیسنگ کی ترجیح تبدیل کی گئی ہے۔

کسی درخواست کا ترجیحی گروپ میں شامل ہونا اس بات کی ضمانت نہیں کہ ویزا فوری طور پر منظور ہوجائے گا۔ درخواست کی مکمل دستاویزات، اضافی معلومات فراہم کرنے کا وقت، صحت اور کردار کی جانچ، قومی سلامتی کی جانچ اور درخواست کی پیچیدگی جیسے عوامل بھی پروسیسنگ کے دورانیے پر اثر انداز ہوں گے۔

مستقل ویزا درخواستوں کے معاملے میں دستیاب امیگریشن پروگرام کی نشستیں بھی اہم کردار ادا کرسکتی ہیں۔

نئے قواعد 19 ستمبر سے نافذ ہیں اور ان کا اطلاق پہلے سے جمع کرائی گئی زیرِ التوا درخواستوں پر بھی ہوگا، جو نئی ترجیحی ترتیب کے مطابق پراسیس کی جائیں گی۔

یہ ترجیحی نظام اسکلز اِن ڈیمانڈ سب کلاس 482 ویزا پر بھی لاگو ہوتا ہے، جبکہ سابقہ ٹمپرری اسکل شارٹیج سب کلاس 482 کا بھی اس نظام میں حوالہ موجود ہے، جسے 7 دسمبر 2024 کو اسکلز اِن ڈیمانڈ ویزا سے تبدیل کیا گیا تھا۔

یوں نئی پالیسی کا بنیادی مقصد ویزا حاصل کرنے کی اہلیت تبدیل کرنا نہیں بلکہ مختلف شعبوں اور درخواست گزاروں کے حالات کو مدنظر رکھتے ہوئے درخواستوں کی پروسیسنگ کی ترجیح مقرر کرنا ہے۔