پاکستان سعودی عرب کی سلامتی اور خودمختاری کے تحفظ کے لیے پرعزم ہے، وزیراعظم

وزیراعظم نے سعودی عرب کے قومی دن کے موقع پر خادمِ حرمین شریفین اور سعودی قیادت کو مبارکباد پیش کی اور حرمین شریفین پر حملوں کی شدید مذمت کی ہے۔

وزیراعظم شہباز شریف نے سعودی عرب کے قومی دن کے موقع پر سعودی عرب کے عوام، خادمِ حرمین شریفین شاہ سلمان اور ولی عہد محمد بن سلمان کو دل کی گہرائیوں سے مبارکباد دی ہے۔

انہوں نے اس عزم کا اظہار کیا کہ پاکستان کو سعودی عرب کے ساتھ اپنے تاریخی اور آزمودہ برادرانہ تعلقات پر فخر ہے، جو باہمی اعتماد اور گہرے رشتوں پر استوار ہیں۔ وزیراعظم نے سعودی عرب کے ترقیاتی سفر کو دونوں اقوام کے لیے باعثِ فخر قرار دیا۔

یہ بھی پڑھیں : پاکستان، ترکیہ، سعودی عرب اور مصر کے وزرائے خارجہ کی سعودی عرب کے دفاع کے حق کی حمایت

اس موقع پر وزیراعظم شہباز شریف نے سعودی عرب کے خلاف حالیہ حوثی حملوں، بالخصوص مقدس شہر مکہ مکرمہ پر ڈرون حملے کی کوشش کی پرزور مذمت کرتے ہوئے کہا کہ حرمین شریفین کے تقدس کو لاحق خطرہ دنیا بھر کے مسلمانوں کے جذبات کو مجروح کرتا ہے۔

انہوں نے دہرایا کہ پاکستان سعودی عرب کی خودمختاری اور سلامتی کے تحفظ کے لیے ہمیشہ شانہ بشانہ کھڑا رہے گا۔