بے نظیر انکم سپورٹ پروگرام کی مفت سم کیسے ایکٹیویٹ ہوگی؟ اہم ہدایت

بینظیر انکم سپورٹ پروگرام کی بینیفشریز خواتین کو ای والٹ کے ذریعے ادائیگی کے نظام میں شامل کرنے کے لیے مفت سم فراہم کرنے کا سلسلہ جاری ہے۔

مفت سم حاصل کرنے والی بعض خواتین کے لیے اس کی ایکٹیویشن کے طریقہ کار سے متعلق سوالات سامنے آئے ہیں، جس پر بی آئی ایس پی کی جانب سے واضح ہدایات دی گئی ہیں۔

بی آئی ایس پی چیئرپرسن سینیٹر روبینہ خالد کے مطابق متعلقہ خواتین کی سم کی ایکٹیویشن بی آئی ایس پی کے دفتر میں متعلقہ موبائل کمپنی کا نمائندہ کرے گا۔

انہوں نے خواتین کو ہدایت کی ہے کہ سم وصول کرتے وقت بی آئی ایس پی کے عملے سے کہیں کہ سم ان کے موبائل فون میں خود ڈال کر دی جائے تاکہ ایکٹیویشن کے عمل میں انہیں غیر ضروری مشکلات کا سامنا نہ کرنا پڑے۔

بینیفشریز کو چاہیے کہ سم کسی غیر متعلقہ فرد سے ایکٹیویٹ کرانے یا اپنی ذاتی معلومات غیر ضروری طور پر شیئر کرنے سے گریز کریں۔

ای والٹ کے ذریعے ادائیگی کے نظام کا مقصد مستحق خواتین کو مالی امداد کی فراہمی کے عمل کو ڈیجیٹل بنانا اور ادائیگیوں کے نظام کو مزید منظم کرنا ہے۔

اگر کسی خاتون کو سم کے اجرا یا ایکٹیویشن کے حوالے سے مسئلہ درپیش ہو تو اسے متعلقہ بی آئی ایس پی مرکز سے رابطہ کرکے اپنی شکایت یا مسئلے کی تصدیق کرنی چاہیے۔