سپلائی خدشات کے باعث دنیا میں خام تیل کی قیمتیں بڑھ گئیں

وینزویلا سے خام تیل خریدنے والے ممالک پر ٹیرف عائد کرنے کی ٹرمپ کی دھمکی اور امریکی خام تیل کی انوینٹریز میں توقع سے کہیں زیادہ کمی کے بعد عالمی سپلائی میں کمی کے خدشات کے باعث بدھ کے روز تیل کی قیمتوں میں اضافہ ہوا۔

عالمی خبر ایجنسی رائٹرز کے مطابق برینٹ کروڈ فیوچر 71 سینٹ یا 0.97 فیصد اضافے کے ساتھ 73.73 ڈالر فی بیرل پر پہنچ گیا، جو 28 فروری کے بعد ان کی بلند ترین سطح ہے۔

اس کے علاوہ امریکی ویسٹ ٹیکساس انٹرمیڈیٹ خام تیل کی قیمت 68 سینٹ یا 0.99 فیصد اضافے کے ساتھ 69.68 ڈالر فی بیرل ہوگئی۔

وینزویلا کے سب سے بڑے خریدار چین کو تیل کی تجارت منگل کے روز اس وقت تعطل کا شکار ہوئی جب امریکی صدر ڈونلڈ ٹرمپ نے کراکس سے تیل خریدنے والے ممالک پر محصولات عائد کرنے کی دھمکی دی تھی۔

پیر کے روز ٹرمپ نے ایک انتظامی حکم نامے پر دستخط کیے تھے جس میں ان کی انتظامیہ کو 1977 کے انٹرنیشنل ایمرجنسی اکنامک پاورز ایکٹ کے تحت وینزویلا سے خام تیل اور مائع ایندھن خریدنے والے کسی بھی ملک سے درآمدات پر 25 فیصد محصولات عائد کرنے کا اختیار دیا گیا تھا۔

بارکلیز کے تجزیہ کاروں نے ایک نوٹ میں کہا کہ وینزویلا کی برآمدات پر رعایت 35 فیصد تک جا سکتی ہے اور کمرشلائزیشن میں مشکلات رکاوٹیں پیدا کر سکتی ہیں جس کی وجہ سے یومیہ 400،000 بیرل تک پیداوار بند ہو سکتی ہے، جو وینزویلا کی نصف سے زیادہ برآمدات ہیں۔

تجزیہ کاروں کا کہنا ہے کہ وینزویلا ممکنہ طور پر 4.9 بلین ڈالر کی آمدنی کھو سکتا ہے، جو اس کی تیل کی برآمدات کا نصف سے زیادہ یا جی ڈی پی کا 10 فیصد سے زیادہ ہے۔

پینمور لیبرم کے تجزیہ کار ایشلے کیلٹی نے کہا کہ "امریکی پابندیوں کی وجہ سے بہاؤ میں تبدیلی کی وجہ سے فزیکل مارکیٹیں سخت ہو رہی ہیں۔

واضح رہے کہ گزشتہ ہفتے واشنگٹن نے ایران کی تیل کی فروخت پر بھی نئی پابندیوں کا اعلان کیا تھا۔