سونے کی قیمت ایک بار پھر ریکارڈ سطح پر، فی تولہ 5 لاکھ روپے سے اوپر پہنچ گیا

کراچی: ملک میں سونے کی قیمت میں ایک بار پھر بڑا اضافہ ریکارڈ کیا گیا ہے، جس کے بعد نرخ نئی تاریخی سطح پر پہنچ گئے ہیں۔

صرافہ مارکیٹ کے مطابق فی تولہ سونا 3 ہزار 500 روپے مہنگا ہونے کے بعد 5 لاکھ 3 ہزار 462 روپے کی سطح پر پہنچ گیا ہے۔ اس اضافے کے بعد سونا ایک بار پھر 5 لاکھ روپے کی حد عبور کر گیا ہے۔

اسی طرح 10 گرام سونے کی قیمت میں بھی 3 ہزار 1 روپے اضافہ ہوا ہے، جس کے بعد نئی قیمت 4 لاکھ 31 ہزار 637 روپے ہو گئی ہے۔

عالمی مارکیٹ میں بھی سونے کے نرخ بڑھ گئے ہیں، جہاں فی اونس سونا 35 ڈالر مہنگا ہو کر 4 ہزار 811 ڈالر کی سطح پر پہنچ گیا ہے۔

دوسری جانب چاندی کی قیمت میں بھی اضافہ دیکھا گیا ہے۔ فی تولہ چاندی 144 روپے مہنگی ہو کر 8 ہزار 404 روپے پر پہنچ گئی ہے۔