بجلی کے بھاری بلوں میں ریلیف!!! بجلی صارفین کیلئے بڑی خوشخبری آگئی

ملک بھر میں 2026 کی پہلی سہ ماہی ایڈجسٹمنٹ کے تحت صارفین کو مجموعی طور پر بڑا ریلیف ملنے کا امکان ظاہر کیا جا رہا ہے۔ اس ریلیف میں کے الیکٹرک سمیت تمام ڈسٹری بیوشن کمپنیوں کے صارفین شامل ہوں گے۔

تفصیلات کے مطابق بجلی تقسیم کار کمپنیوں نے نیپرا میں باقاعدہ درخواست جمع کروا دی ہے۔ اس درخواست میں جنوری سے مارچ 2026 کے دوران صارفین کو تقریباً 63 ارب 93 کروڑ 60 لاکھ روپے تک ریلیف دینے کی تجویز شامل ہے۔ نیپرا اس درخواست پر 19 مئی کو سماعت کرے گا اور حتمی فیصلہ جاری کیا جائے گا۔

درخواست میں مختلف مدات کے تحت قیمتوں میں کمی کی تجاویز دی گئی ہیں۔ کیپسٹی چارجز میں 36 ارب 83 کروڑ 70 لاکھ روپے کی کمی مانگی گئی ہے۔ اس کے ساتھ سسٹم استعمال چارجز اور مارکیٹ آپریشن فیس میں 11 ارب 24 کروڑ 30 لاکھ روپے کی کمی کی درخواست بھی شامل ہے۔

اسی طرح انکریمنٹل یونٹس کی مد میں 23 ارب 51 کروڑ روپے کمی کی تجویز دی گئی ہے۔ جبکہ نقصانات کی مد میں 2 ارب 77 کروڑ 70 لاکھ روپے کی وصولی کی درخواست بھی دائر کی گئی ہے۔

ذرائع کے مطابق اگر نیپرا اس درخواست کو منظور کر لیتا ہے تو بجلی کی قیمتوں میں واضح کمی ہو سکتی ہے۔ اس فیصلے کا فائدہ کے الیکٹرک صارفین کو بھی ملے گا۔ اس سے گھریلو اور کمرشل صارفین دونوں کو ریلیف ملنے کی توقع ہے۔