بجلی کے بھاری بلوں سے پریشان صارفین کیلئے بڑی خوشخبری آگئی

نیپرا میں ہونے والی حالیہ سماعت کے بعد امکان ظاہر کیا جا رہا ہے کہ عوام کو بجلی بلوں میں مجموعی طور پر تقریباً 64 ارب روپے کا بڑا ریلیف مل سکتا ہے۔ اگر اس منظوری کو حتمی شکل دے دی گئی تو صارفین کو فی یونٹ بجلی کی قیمت میں واضح کمی کا فائدہ حاصل ہوگا۔

تفصیلات کے مطابق بجلی تقسیم کار کمپنیوں نے سال 2026 کی پہلی سہ ماہی یعنی جنوری سے مارچ تک کی ایڈجسٹمنٹ سے متعلق درخواستیں نیپرا میں جمع کروائیں۔ ان درخواستوں پر سماعت ہوئی۔

سماعت کے دوران حکام نے بتایا کہ کپیسٹی چارجز میں تقریباً 36 ارب روپے سے زائد کی کمی ریکارڈ کی گئی۔ اسی طرح یوز آف سسٹم چارجز اور مارکیٹ آپریشن فیس میں بھی اربوں روپے کی کمی سامنے آئی۔ ان عوامل کی وجہ سے صارفین کو ریلیف دینے کی تجویز دی گئی ہے۔

میپکو حکام نے بتایا کہ ان کی کمپنی نے سہ ماہی ایڈجسٹمنٹ میں 6 ارب روپے سے زائد کمی کی درخواست دی ہے۔ صنعتی شعبے کو بجلی کی فروخت میں نمایاں اضافہ ہوا ہے، جس سے آمدنی بہتر ہوئی اور مالی دباؤ میں کمی آئی۔

پیسکو کی جانب سے بھی اربوں روپے کمی کی درخواست دی گئی۔ حکام کے مطابق سسٹم چارجز اور کپیسٹی پیمنٹ میں کمی کے باعث صارفین کو ریلیف دینا ممکن ہوا ہے۔

نیپرا میں زیر سماعت تجاویز کے مطابق بجلی کی قیمت میں تقریباً 1 روپے 93 پیسے فی یونٹ تک کمی کا امکان ہے۔ اگر یہ فیصلہ منظور ہو جاتا ہے تو گھریلو صارفین کے ساتھ ساتھ صنعتوں کو بھی بڑا فائدہ پہنچے گا۔

سماعت کے دوران بجلی پیدا کرنے کی صلاحیت پر بھی گفتگو ہوئی۔ حکام نے بتایا کہ پاکستان میں اس وقت تقریباً 45 ہزار میگاواٹ بجلی پیدا کرنے کی صلاحیت موجود ہے، جبکہ ضرورت کے مطابق صرف 25 ہزار میگاواٹ بجلی استعمال کی جا رہی ہے۔