بلوچستان میں پیٹرول اور ڈیزل 500 روپے فی لیٹر فروخت ہونے لگا

  بلوچستان کے مختلف علاقوں میں پیٹرولیم مصنوعات کی شدید قلت نے شہریوں کی مشکلات میں اضافہ کر دیا ہے۔

 کئی اضلاع میں پیٹرول اور ڈیزل کی دستیابی محدود ہونے کے باعث قیمتوں میں غیرمعمولی اضافہ دیکھا جا رہا ہے۔ نوشکی، خاران اور لورالائی میں پیٹرول اور ڈیزل 500 روپے فی لیٹر فروخت کیا جا رہا ہے۔

مقامی ذرائع کے مطابق ایندھن کی کمی کے باعث متعدد پیٹرول پمپس پر سپلائی متاثر ہوئی ہے۔ کئی مقامات پر شہریوں کو گھنٹوں انتظار کے باوجود پیٹرول نہیں مل رہا۔ اس صورتحال نے روزمرہ زندگی کو بری طرح متاثر کیا ہے اور لوگوں کو سفر اور کاروباری سرگرمیوں میں مشکلات کا سامنا کرنا پڑ رہا ہے۔

ٹرانسپورٹرز کا کہنا ہے کہ ایندھن کی عدم دستیابی کے باعث کئی گاڑیاں کھڑی ہیں جبکہ بعض روٹس پر مسافر گاڑیوں کی تعداد بھی کم ہو گئی ہے۔ اس کا براہ راست اثر عام شہریوں اور کاروباری طبقے پر پڑ رہا ہے۔

واضح رہے کہ پاک ایران بارڈر بند ہونے کے باعث ایرانی پیٹرول کی ترسیل رک گئی ہے۔