وفاقی وزیرِ پیٹرولیم نے عوام کو بڑی خوشخبری سنادی

وفاقی وزیرِ پیٹرولیم علی پرویز ملک کا کہنا ہے کہ حکومت جلد گیس صارفین کے لیے خوشخبری کا اعلان کر سکتی ہے۔ مقامی سطح پر پیدا ہونے والی سستی گیس کی بنیاد پر نرخوں میں کمی یا نئی قیمتوں کا تعین زیر غور ہے۔

وفاقی وزیرِ پیٹرولیم علی پرویز ملک نے کہا کہ حالیہ عالمی حالات اور خطے میں پیدا ہونے والی کشیدگی کے دوران مائع قدرتی گیس (ایل این جی) کی سپلائی میں وقتی مشکلات سامنے آئیں۔ اس صورتحال کے بعد بجلی کے شعبے میں مقامی گیس کا استعمال بڑھا دیا گیا تاکہ نظام کو چلایا جا سکے۔

وزیر پیٹرولیم کے مطابق مقامی گیس کی قیمت تقریباً 2 ہزار روپے فی ایم ایم بی ٹی یو ہے۔ جبکہ درآمدی ایل این جی کی لاگت ساڑھے تین ہزار روپے فی ایم ایم بی ٹی یو تک پہنچ جاتی ہے۔ اس فرق کی وجہ سے حکومت کو نسبتاً سستی گیس استعمال کرنے کا موقع ملا۔

انہوں نے کہا کہ مقامی گیس کی نئی قیمتوں اور پالیسی کے حوالے سے ایک سمری جلد وفاقی کابینہ میں پیش کی جائے گی۔ کابینہ کی منظوری کے بعد اس پر حتمی فیصلہ کیا جائے گا اور عوام کو آگاہ کیا جائے گا۔

علی پرویز ملک نے کہا کہ مشکل حالات کے دوران ملک کی گیس ضروریات پوری کرنے کے لیے مقامی پیداوار میں اضافہ کیا گیا۔ روزانہ تقریباً 40 کروڑ مکعب فٹ اضافی گیس سسٹم میں شامل کی گئی، جس سے توانائی کا نظام بہتر انداز میں چلتا رہا۔

انہوں نے کہا کہ حکومت گیس کے شعبے میں موجود گردشی قرضے کے مسئلے پر بھی کام کر رہی ہے۔ اس مسئلے کے حل کے لیے مختلف تجاویز زیر غور ہیں تاکہ توانائی کے شعبے کو مالی طور پر مستحکم بنایا جا سکے۔