بجٹ 27-2026؛ سرکاری ملازمین کی تنخواہوں میں کتنا اضافہ ہو گا؟ بڑی خبر آگئی

آئندہ مالی سال 2026-27 کے وفاقی بجٹ سے قبل حکومتی اتحادی جماعت پاکستان پیپلز پارٹی نے اپنی اہم تجاویز اور مطالبات حکومت کے سامنے رکھ دیے ہیں۔

ذرائع کے مطابق پیپلز پارٹی نے بجٹ میں عام شہریوں، سرکاری ملازمین، پنشنرز اور مزدور طبقے کو زیادہ سے زیادہ ریلیف دینے پر زور دیا ہے۔ پارٹی کا مؤقف ہے کہ ملک میں مسلسل بڑھتی مہنگائی نے عوام کی مالی مشکلات میں نمایاں اضافہ کر دیا ہے، اس لیے بجٹ میں ایسے اقدامات کیے جائیں جو براہِ راست عوام کو فائدہ پہنچا سکیں۔

ذرائع کے مطابق پاکستان پیپلز پارٹی نے سرکاری ملازمین کی تنخواہوں اور ریٹائرڈ ملازمین کی پنشن میں 50 فیصد اضافے کی تجویز دی ہے۔ گزشتہ چند برسوں کے دوران اشیائے خورونوش، بجلی، گیس اور دیگر ضروریاتِ زندگی کی قیمتوں میں غیر معمولی اضافہ ہوا ہے۔ اس صورتحال میں موجودہ تنخواہیں اور پنشن اخراجات پورے کرنے کے لیے ناکافی ہو چکی ہیں۔ اسی لیے ملازمین اور پنشنرز کو خاطر خواہ ریلیف دینا وقت کی اہم ضرورت ہے۔

پیپلز پارٹی نے کم آمدنی والے طبقے کے لیے کم از کم ماہانہ اجرت بڑھانے کی تجویز بھی پیش کی ہے۔ پارٹی کا مؤقف ہے کہ مزدور طبقہ مہنگائی سے سب سے زیادہ متاثر ہوا ہے۔ ایسے میں کم از کم تنخواہ میں اضافہ لاکھوں خاندانوں کے لیے کچھ آسانی پیدا کر سکتا ہے۔

ذرائع کا کہنا ہے کہ پیپلز پارٹی نے نئے ٹیکسز عائد کرنے اور پیٹرولیم لیوی میں مزید اضافے کی سخت مخالفت کی ہے۔ عوام پہلے ہی مختلف ٹیکسوں اور مہنگی توانائی کے بوجھ تلے دبے ہوئے ہیں۔ اس لیے مزید ٹیکس عائد کرنے سے عام آدمی کی مشکلات میں اضافہ ہوگا۔

ذرائع کے مطابق حکومت نے تنخواہوں اور پنشن میں 50 فیصد اضافے کے مطالبے سے اتفاق نہیں کیا۔ اسی وجہ سے بجٹ معاملات پر دونوں اتحادی جماعتوں کے درمیان اختلافات سامنے آئے ہیں۔