بجٹ 27-2026؛ وزارت خزانہ سے تنخواہ دار طبقے کیلئے بڑی خبر آگئی

وزیر خزانہ کے مشیر خرم شہزاد نے کہا ہے کہ آئندہ بجٹ میں کوشش کی جائے گی کہ تنخواہ دار افراد پر کم سے کم ٹیکس بوجھ ڈالا جائے تاکہ عام ملازمین کو ریلیف مل سکے۔

ایک نجی ٹی وی پروگرام میں گفتگو کرتے ہوئے خرم شہزاد نے کہا کہ حکومت اس بات پر غور کر رہی ہے کہ کم از کم تنخواہ کو مہنگائی کی موجودہ شرح کے مطابق مقرر کیا جائے۔ بجٹ میں ٹیکس نظام کو اس طرح ترتیب دیا جا رہا ہے کہ متوسط اور تنخواہ دار طبقے پر اضافی دباؤ نہ پڑے۔

پروگرام میں دیگر معاشی و تجارتی نمائندوں نے بھی اپنی رائے دی۔ آل پاکستان انجمن تاجران کے صدر اجمل بلوچ نے کہا کہ ملک کی بڑی آبادی کی قوت خرید کم ہو چکی ہے۔ تقریباً 150 صنعتیں بند ہو چکی ہیں جس سے معاشی صورتحال مزید خراب ہوئی ہے۔ انہوں نے حکومت سے مطالبہ کیا کہ عوام کی خریداری کی صلاحیت بڑھانے کے لیے عملی اقدامات کیے جائیں۔

اسی موقع پر کسان اتحاد کے مرکزی چیئرمین خالد حسین باٹھ نے بھی تشویش کا اظہار کیا۔ انہوں نے کہا کہ بعض علاقوں میں کسانوں کے گھروں پر کارروائیاں کی جا رہی ہیں اور گندم بھی اٹھائی جا رہی ہے۔ کئی مقامات پر پہلے سے خریدی گئی گندم بھی لے لی گئی، جو کسانوں کے لیے نقصان دہ ہے۔

انہوں نے کہا کہ جب حکومت گندم کی خرید و فروخت کو نجی شعبے کے حوالے کر رہی ہے تو پھر کسانوں کے ساتھ اس طرح کا سلوک کیوں کیا جا رہا ہے۔ کسان پہلے ہی مشکلات کا شکار ہیں اور انہیں مزید ریلیف کی ضرورت ہے۔