پاکستان میں پیٹرول کی قیمتوں میں بڑی کمی کا امکان

عالمی منڈی میں پیٹرولیم مصنوعات کی قیمتیں گزشتہ تین ماہ کی کم ترین سطح پر آنے کے بعد پاکستان میں بھی پیٹرول اور ڈیزل کی قیمتوں میں نمایاں کمی کا امکان ہے۔

 ذرائع کے مطابق آئندہ پندرہ روزہ جائزے کے دوران پیٹرول کی قیمت میں 22 روپے فی لیٹر تک جبکہ ہائی اسپیڈ ڈیزل کی قیمت میں 42 روپے فی لیٹر تک بڑی کمی کی تجاویز زیرِ غور ہیں۔

معاشی ماہرین کا کہنا ہے کہ اگر حکومت نے ان سفارشات کی منظوری دی تو اس کے مثبت اثرات براہِ راست ٹرانسپورٹ سیکٹر اور عام صارفین تک پہنچیں گے، جس سے سفری و مال برداری کے اخراجات کم ہوں گے اور ملک میں جاری مہنگائی کے دباؤ میں بھی واضح کمی آئے گی۔

دوسری جانب وزارتِ خزانہ اور پیٹرولیم کے ذرائع کا کہنا ہے کہ حکومت ڈیزل پر پیٹرولیم لیوی میں 27 روپے فی لیٹر تک اضافے کی تجویز پر بھی غور کر رہی ہے۔

معاشی تجزیہ کاروں کے مطابق اگر حکومت نے اپنے ریونیو کے اہداف کو پورا کرنے کے لیے لیوی میں اضافے کی اس تجویز کو منظور کیا، تو عالمی منڈی کے گرتے ہوئے رجحان کے باعث عوام کو ملنے والے ممکنہ ریلیف کی شرح بری طرح متاثر ہو سکتی ہے۔

بین الاقوامی مارکیٹ کے حوالے سے ماہرین نے بتایا کہ عالمی منڈی میں خام تیل کی قیمتوں میں حالیہ کمی بنیادی طور پر رسد (سپلائی) میں اضافے اور خطے میں جاری سیاسی و عسکری کشیدگی میں کمی کے باعث دیکھی جا رہی ہے۔

 واضح رہے کہ عالمی مارکیٹ میں خام تیل کی قیمت فروری کے آخر میں ایران سے متعلق کشیدگی بڑھنے کے بعد پہلی بار 75 ڈالر کی نفسیاتی حد سے نیچے گر کر 73.80 ڈالر فی بیرل کی سطح پر آ گئی ہے، جس کے اثرات پاکستان سمیت تمام تیل درآمد کرنے والے ممالک کی معیشتوں پر مرتب ہو رہے ہیں۔