پنجاب حکومت کی جانب سے بینک میں 30 ارب روپے تک ایکویٹی سرمایہ کاری کی منظوری دے دی

بینک آف پنجاب کے بورڈ آف ڈائریکٹرز نے پنجاب حکومت کی جانب سے بینک میں 30 ارب روپے تک ایکویٹی سرمایہ کاری کی منظوری دے دی۔

بینک آف پنجاب کے مطابق یہ سرمایہ کاری عام شیئرز کے اجرا کے ذریعے کی جائے گی، تاہم اس کے لیے متعلقہ قانونی، کارپوریٹ، شیئر ہولڈرز اور ریگولیٹری منظوری حاصل کرنا ضروری ہوگا۔

بورڈ کی منظوری کے مطابق نئے شیئرز 38.20 روپے فی شیئر کی کم از کم قیمت پر جاری کیے جائیں گے۔ تاہم اگر شیئرز کے اجرا کے وقت بینک کے حصص کی مارکیٹ قیمت 38.20 روپے سے زیادہ ہوئی تو اجرا کی قیمت موجودہ مارکیٹ قیمت سے 5 فیصد اضافی پریمیم کے ساتھ مقرر کی جائے گی۔بینک آف پنجاب کا کہنا ہے کہ مجوزہ سرمایہ کاری کا مقصد بینک کے سرمایہ جاتی ڈھانچے کو مضبوط بنانا اور مستقبل میں کاروباری سرگرمیوں اور ترقی کے لیے اضافی مالی گنجائش پیدا کرنا ہے۔

بینک کے مطابق گزشتہ چند برسوں کے دوران اس کے کاروباری حجم اور مالی کارکردگی میں نمایاں اضافہ ہوا ہے، جبکہ بینک نے چھوٹے و درمیانے درجے کے کاروبار، زرعی فنانسنگ، کم لاگت رہائش، خواتین کی قیادت، کریڈٹ کارڈز اور ڈیجیٹل قرضوں سمیت مختلف شعبوں میں اپنی پوزیشن مستحکم کی ہے۔

پریس ریلیز کے مطابق بینک کے کاروباری پھیلاؤ کے باعث اس کے سرمایہ جاتی ڈھانچے پر بھی دباؤ بڑھا، جس کے پیش نظر نئی سرمایہ کاری سے بینک کے سرمائے کو مزید مضبوط بنانے اور کاروباری ترقی جاری رکھنے میں مدد ملے گی۔

بینک آف پنجاب کے مطابق 2025 کے دوران آمدنی میں تقریباً 29 فیصد جبکہ منافع میں 40 فیصد سے زائد سالانہ اضافہ ریکارڈ کیا گیا۔ نئی سرمایہ کاری بینک کی آئندہ توسیعی حکمت عملی، بشمول اسٹیٹ بینک آف پاکستان سے حال ہی میں منظور ہونے والے بین الاقوامی منصوبے، کے لیے استعمال کی جائے گی۔

بینک آف پنجاب کے صدر اور چیف ایگزیکٹو آفیسر ظفر مسعود نے کہا کہ پنجاب حکومت کی جانب سے سرمایہ کاری کی منظوری بینک کی حکمت عملی اور انتظامیہ پر اعتماد کا اظہار ہے۔ ان کے مطابق اس سرمایہ کاری سے ترجیحی شعبوں میں بینک کی سرگرمیوں کو مزید وسعت دینے میں مدد ملے گی۔

پریس ریلیز کے مطابق ایکویٹی سرمایہ کاری مرحلہ وار کی جائے گی اور اس پورے عمل کو 30 جون 2027 تک مکمل کرنے کا ہدف مقرر کیا گیا ہے۔

بینک آف پنجاب پاکستان اسٹاک ایکسچینج میں فہرست شدہ کمرشل بینک ہے اور اس کے اکثریتی حصص پنجاب حکومت کی ملکیت ہیں۔