عالمی منڈی میں سونا مزید مہنگا، قیمت 2 ماہ کی بلند ترین سطح پر پہنچ گئی

عالمی منڈی میں سونے کی قیمت میں مسلسل تیسرے روز اضافہ ریکارڈ کیا گیا ہے، جس کے بعد قیمتی دھات کی قیمت تقریباً دو ماہ کی بلند ترین سطح پر پہنچ گئی۔

غیر ملکی خبر رساں ادارے رائٹرز کے مطابق اسپاٹ گولڈ کی قیمت میں 1 فیصد اضافہ ہوا، جس کے بعد یہ 4,432.74 ڈالر فی اونس کی سطح پر پہنچ گئی۔ یہ قیمت 5 جون کے بعد سونے کی بلند ترین سطح ہے۔

دوسری جانب امریکی گولڈ فیوچرز کی قیمت بھی 1.7 فیصد بڑھ کر 4,492.60 ڈالر فی اونس ہوگئی۔

چاندی اور دیگر قیمتی دھاتیں بھی مہنگی

عالمی مارکیٹ میں صرف سونا ہی نہیں بلکہ دیگر قیمتی دھاتوں کی قیمتوں میں بھی اضافہ دیکھا گیا۔

رپورٹ کے مطابق چاندی کی قیمت 0.9 فیصد اضافے کے بعد 66.30 ڈالر فی اونس، پلاٹینم 0.7 فیصد بڑھ کر 1,765.26 ڈالر جبکہ پیلاڈیم کی قیمت 0.8 فیصد اضافے کے بعد 1,394 ڈالر فی اونس ہوگئی۔

سونے کی قیمت میں حالیہ تیزی نے عالمی سطح پر سرمایہ کاروں کی توجہ ایک مرتبہ پھر قیمتی دھات کی جانب مبذول کرائی ہے۔ عام طور پر عالمی معاشی غیر یقینی، جغرافیائی سیاسی کشیدگی اور شرح سود سے متعلق توقعات سونے کی طلب پر اثر انداز ہوتی ہیں۔

مارکیٹ میں اب سرمایہ کاروں کی توجہ امریکا سے جاری ہونے والے آئندہ مہنگائی کے اعدادوشمار اور شرح سود سے متعلق توقعات پر مرکوز ہے۔ ان عوامل سے یہ اندازہ لگانے میں مدد ملے گی کہ آنے والے دنوں میں سونے کی قیمت کا رخ کس جانب ہوسکتا ہے۔

ماہرین کے مطابق اگر عالمی معاشی اور جغرافیائی سیاسی حالات سونے کے لیے سازگار رہے تو درمیانی مدت میں اس کی قیمت میں مزید اضافہ ہوسکتا ہے۔

مارکیٹ تجزیہ کار ٹونی سائکامور نے بھی سونے کے مستقبل میں 5 ہزار ڈالر فی اونس کی سطح تک پہنچنے کا امکان ظاہر کیا ہے۔

تاہم ماہرین کے مطابق سونے کی قیمت میں تیزی کے باوجود عالمی شرح سود، امریکی ڈالر کی قدر، افراط زر اور جغرافیائی سیاسی صورتحال میں تبدیلی قیمتی دھات کی قیمتوں پر براہِ راست اثر ڈال سکتی ہے، اس لیے مستقبل کی قیمتوں کے بارے میں حتمی پیش گوئی کرنا قبل از وقت ہوگا۔