آئی ایف ایف سی او کا پاکستان میں مزید سرمایہ کاری بڑھانے کا اعلان

اسلام آباد: وزیر خزانہ محمد اورنگزیب سے آئی ایف ایف سی او گروپ کے وفد نے ملاقات کی، جس میں گروپ نے پاکستان میں اپنی سرمایہ کاری مزید بڑھانے میں دلچسپی کا اظہار کیا۔

وزارت خزانہ کی جانب سے جاری اعلامیے کے مطابق آئی ایف ایف سی او گروپ کی پاکستان میں موجودہ سرمایہ کاری تقریباً 10 کروڑ ڈالر ہے، جبکہ گروپ 2006 سے ملک میں کاروباری سرگرمیاں جاری رکھے ہوئے ہے۔

اعلامیے میں بتایا گیا کہ آئی ایف ایف سی او نے پاکستان میں ایک ریفائنری سے اپنی کاروباری سرگرمیوں کا آغاز کیا تھا، تاہم اب گروپ کے ملک میں 2 ریفائنریز اور 5 مینوفیکچرنگ یونٹس قائم ہیں۔

ملاقات کے دوران وزیر خزانہ محمد اورنگزیب نے کہا کہ آئی ایف ایف سی او پاکستان میں روزگار کے مواقع اور مقامی پیداوار کے فروغ میں اہم کردار ادا کر رہا ہے۔

انہوں نے کہا کہ حکومت موجودہ سرمایہ کاروں کو کاروباری سرگرمیوں میں توسیع اور مزید سرمایہ کاری کے لیے ہر ممکن سہولت فراہم کرے گی۔

وزیر خزانہ نے اس عزم کا بھی اظہار کیا کہ حکومت پاکستان میں سرمایہ کاری کے فروغ اور کاروباری ماحول کو مزید بہتر بنانے کے لیے اقدامات جاری رکھے گی۔