پیسکو پنشنرز کیلئے بڑی سہولت، ویلفیئر فنڈ گرانٹ کی ادائیگی آسان کردی گئی

پشاور الیکٹرک سپلائی کمپنی (پیسکو) نے پنشنرز اور مستحق افراد کیلئے ویلفیئر فنڈ گرانٹ کے حصول کا طریقہ کار آسان کردیا ہے۔

پیسکو ہیڈکوارٹر سے جاری نوٹیفکیشن کے مطابق بیوہ پنشنرز کیلئے ویلفیئر فنڈ گرانٹ حاصل کرنے کی الگ کارروائی ختم کردی گئی ہے۔ اس فیصلے کے بعد مستحق بیوہ پنشنرز کو گرانٹ کی رقم لینے کیلئے الگ سے درخواست یا ادائیگی کے عمل سے گزرنے کی ضرورت نہیں ہوگی۔

نئے طریقہ کار کے تحت جب کسی بیوہ پنشنر کی ویلفیئر فنڈ گرانٹ منظور ہوجائے گی تو اس کی رقم ماہانہ پنشن کے ساتھ شامل کرکے ادا کی جائے گی۔ اس سے گرانٹ کے حصول میں آنے والی دفتری رکاوٹیں کم ہونے کی توقع ہے۔

پیسکو نے معذور اور مستحق بچوں کیلئے بھی اہم سہولت فراہم کی ہے۔ نوٹیفکیشن کے مطابق ایسے بچوں کی منظور شدہ ویلفیئر گرانٹ ان کے سرپرست کی ماہانہ تنخواہ کے ساتھ منتقل کی جائے گی۔

اس تبدیلی سے بچوں کے سرپرستوں کو بھی الگ سے گرانٹ حاصل کرنے کیلئے کارروائی نہیں کرنا پڑے گی۔ انہیں گرانٹ کی رقم کیلئے علیحدہ بل جمع کروانے کی ضرورت بھی ختم کردی گئی ہے۔ اس طرح ادائیگی کا عمل پہلے کے مقابلے میں آسان ہوجائے گا۔

پیسکو حکام کے مطابق نئے نظام کا مقصد گرانٹ کی ادائیگی میں ہونے والی تاخیر کو کم کرنا ہے۔ اس کے ساتھ غیر ضروری دفتری کارروائیوں میں بھی کمی لائی جائے گی۔ مستحق افراد کو بار بار متعلقہ دفاتر کے چکر لگانے سے بھی نجات مل سکے گی۔

نوٹیفکیشن میں متعلقہ افسران کو بیوہ پنشنرز اور معذور بچوں سے متعلق کیسز بروقت جمع کروانے کی ہدایت کی گئی ہے۔ حکام کو کہا گیا ہے کہ منظور شدہ گرانٹ کی ادائیگی میں غیر ضروری تاخیر نہ کی جائے۔

پیسکو نے مختلف ڈویژنز سے پنشن اور ویلفیئر فنڈ جاری ہونے کی صورت میں بھی ضروری کارروائی مکمل کرنے کی ہدایت کی ہے۔ متعلقہ افسران کو اس بات کو یقینی بنانے کا کہا گیا ہے کہ پنشن اور ویلفیئر گرانٹ کی ادائیگی ایک ہی ڈویژن سے کی جائے۔

نئے نظام کے تحت ویلفیئر فنڈ گرانٹ کو ماہانہ پنشن اور تنخواہ کے ادائیگی کے عمل کے ساتھ منسلک کردیا گیا ہے۔ اس سے مستحق بیوہ پنشنرز اور معذور بچوں کے سرپرستوں کیلئے رقم حاصل کرنا زیادہ آسان ہوسکتا ہے۔