نزلہ و زکام میں دہی کھانا خطرناک یا فائدہ مند؟ حقیقت جان کر حیران ہوجائیں گے

کراچی میں موسم کی تبدیلی کے ساتھ بخار، نزلہ اور زکام کے کیسز میں اضافہ دیکھا جا رہا ہے۔ ایسے حالات میں شہریوں میں ایک عام سوال یہ بھی ہے کہ بیماری کے دوران دہی کا استعمال کرنا فائدہ مند ہے یا نقصان دہ۔

عام لوگوں میں اس حوالے سے مختلف رائے پائی جاتی ہے۔ کچھ افراد سمجھتے ہیں کہ دہی کھانے سے گلا خراب ہو سکتا ہے یا نزلہ بڑھ سکتا ہے۔ جبکہ طبی ماہرین کہتے ہیں کہ اس کا اثر ہر انسان میں ایک جیسا نہیں ہوتا۔

ماہرین صحت کے مطابق دہی میں مفید بیکٹیریا پائے جاتے ہیں جنہیں پروبایوٹکس کہا جاتا ہے۔ یہ نظامِ ہاضمہ کو بہتر بنانے اور جسم کی مدافعتی طاقت بڑھانے میں مدد دیتے ہیں۔ اس لیے بعض حالات میں دہی فائدہ بھی دے سکتی ہے۔

اگر کسی مریض کو نزلہ یا زکام کے دوران زیادہ بلغم، شدید کھانسی یا سینے میں جکڑن نہ ہو تو وہ معتدل مقدار میں دہی استعمال کر سکتا ہے۔ خاص طور پر تازہ اور عام درجہ حرارت پر رکھی ہوئی دہی زیادہ بہتر سمجھی جاتی ہے۔

لیکن اگر کسی شخص کو پہلے سے گلا خراب ہو، بلغم زیادہ ہو یا سینے میں دباؤ محسوس ہو رہا ہو تو اس صورت میں دہی کا استعمال علامات کو بڑھا سکتا ہے۔ اس لیے ایسی حالت میں احتیاط کرنا بہتر ہے۔

ڈاکٹرز کا یہ بھی کہنا ہے کہ فریج کی ٹھنڈی دہی فوراً کھانے کے بجائے کچھ دیر باہر رکھ کر استعمال کی جائے تاکہ جسم پر اس کا اثر کم ہو۔

ماہرین کے مطابق ہر انسان کا جسم مختلف ہوتا ہے، اس لیے دہی یا کسی بھی غذا کا استعمال کرتے وقت اپنی جسمانی حالت اور ذاتی تجربے کو ضرور مدنظر رکھنا چاہیے۔