جوان افراد میں معدے کے کینسر کے بڑھتے کیسز کی اہم وجہ سامنے آگئی

معدے کا کینسر دنیا بھر میں سرطان کی پانچویں سب سے عام قسم ہے، جبکہ کینسر سے ہونے والی اموات میں یہ تیسرے نمبر پر شمار ہوتا ہے۔

ماہرین کے مطابق تمباکو نوشی، معدے کی سوزش اور موٹاپا اس بیماری کے خطرے کو بڑھانے والے اہم عوامل میں شامل ہیں۔

ماضی میں معدے کے کینسر کو زیادہ تر بڑی عمر کے افراد سے منسلک کیا جاتا تھا، تاہم حالیہ برسوں میں 50 سال سے کم عمر افراد میں اس کے کیسز میں اضافہ دیکھا جا رہا ہے۔ اب ایک نئی طبی تحقیق میں اس رجحان کی ممکنہ اہم وجہ بھی سامنے آئی ہے۔

امریکا میں کی جانے والی تحقیق کے مطابق میٹھے مشروبات، بالخصوص سافٹ ڈرنکس، کا زیادہ استعمال معدے کے کینسر کے خطرے میں نمایاں اضافے سے منسلک ہے۔

ماس جنرل بریگھم کینسر انسٹیٹیوٹ کے محققین نے ایک لاکھ 12 ہزار سے زائد افراد کے طبی اور غذائی ڈیٹا کا جائزہ لیا۔ تحقیق میں شرکا کے مشروبات اور غذاؤں کے استعمال کے ساتھ ان کے جسمانی وزن، جسمانی سرگرمی، تمباکو نوشی، الکحل کے استعمال، ادویات اور دیگر طبی عوامل کو بھی مدنظر رکھا گیا۔

شرکا کی صحت کا کئی دہائیوں تک جائزہ لینے کے دوران 278 افراد میں معدے کے کینسر کی تشخیص ہوئی۔

تحقیق کے نتائج کے مطابق روزانہ صرف ایک میٹھے مشروب یا سافٹ ڈرنک کا استعمال معدے کے کینسر کے خطرے کو دو گنا سے بھی زیادہ بڑھنے سے منسلک پایا گیا۔

محققین کا کہنا ہے کہ یہ پہلی تحقیق ہے جس میں میٹھے مشروبات کے استعمال اور معدے کے کینسر کے درمیان اس نوعیت کا تعلق سامنے آیا ہے۔ تاہم انہوں نے واضح کیا کہ تحقیق کی کچھ حدود ہیں اور نتائج کی مزید تصدیق کے لیے اضافی مطالعات کی ضرورت ہے۔

ماضی کی تحقیقات میں بھی میٹھے مشروبات کے استعمال کو آنتوں، بریسٹ اور جگر سمیت کینسر کی بعض دیگر اقسام کے بڑھتے خطرے سے منسلک کیا جاچکا ہے۔

معدے کا کینسر معدے کے مختلف حصوں میں ظاہر ہوسکتا ہے اور بیماری کی شدت بڑھنے کی صورت میں اس کا علاج مشکل ہوسکتا ہے۔ ماہرین کے مطابق نئی تحقیق اس بات کی اہمیت اجاگر کرتی ہے کہ غذا اور مشروبات کے انتخاب کو بھی کینسر کے خطرات کا جائزہ لیتے وقت مدنظر رکھا جانا چاہیے۔

تحقیق کے نتائج Gastro Hep Advances نامی طبی جریدے میں شائع ہوئے۔