انار کھانے سے ہارٹ فیلیئر میں دل کے افعال بہتر ہونے کا امکان

ہارٹ فیلیئر ایک طویل المدتی بیماری ہے جس میں دل جسم کی ضروریات کے مطابق مناسب مقدار میں خون پمپ کرنے سے قاصر ہوجاتا ہے۔ اس کا مطلب یہ نہیں کہ دل مکمل طور پر کام کرنا چھوڑ دیتا ہے، بلکہ اس کی کارکردگی پہلے کی نسبت کم ہوجاتی ہے۔

ہارٹ فیلیئر کا فی الحال کوئی حتمی علاج موجود نہیں، تاہم مختلف ادویات اور دیگر طبی اقدامات کے ذریعے بیماری کو بڑھنے سے روکنے اور دل کے افعال کو بہتر رکھنے کی کوشش کی جاتی ہے۔

اب ایک نئی تحقیق میں انار کے استعمال اور ہارٹ فیلیئر سے متاثرہ دل کے افعال کے درمیان ممکنہ تعلق سامنے آیا ہے۔ تحقیق کے مطابق انار میں موجود بعض قدرتی مرکبات دل کی کارکردگی کو برقرار رکھنے میں مددگار ثابت ہوسکتے ہیں۔

جرنل Science Advances میں شائع ہونے والی تحقیق میں بتایا گیا کہ انار میں پائے جانے والے پولی فینولز کی ایک قسم Ellagitannins دل کے افعال کے لیے مفید اثرات رکھ سکتی ہے۔

محققین نے اس تحقیق کے دوران جانوروں اور انسانی دل کے ٹشوز پر تجربات کیے، جنہیں اسٹیم سیلز کی مدد سے تیار کیا گیا تھا۔ مختلف قدرتی مرکبات کے اثرات کا جائزہ لینے کے بعد ماہرین نے ایسے شواہد حاصل کیے جو دل کے افعال پر ممکنہ مثبت اثرات کی نشاندہی کرتے ہیں۔

تحقیق میں انار کے علاوہ اخروٹ اور بیریز میں پائے جانے والے بعض مرکبات کو بھی دل کے افعال کے لیے مفید قرار دیا گیا ہے۔

محققین کے مطابق ہارٹ فیلیئر کے علاج میں گزشتہ برسوں کے دوران پیش رفت ہوئی ہے، تاہم موجودہ علاج اب بھی بیماری سے پیدا ہونے والے دل کے بعض منفی اثرات کو مکمل طور پر ختم کرنے میں محدود ہیں۔ اسی لیے نئے علاج اور ممکنہ حفاظتی طریقوں کی تلاش جاری ہے۔

ماہرین کا کہنا ہے کہ ان قدرتی مرکبات پر مبنی ادویات یا سپلیمنٹس مستقبل میں ہارٹ فیلیئر کے مریضوں کے لیے مفید ثابت ہوسکتے ہیں، تاہم اس امکان کی تصدیق کے لیے حقیقی مریضوں پر مزید طبی تحقیق ضروری ہے۔

محققین نے واضح کیا کہ موجودہ تحقیق کی بنیاد پر یہ دعویٰ نہیں کیا جاسکتا کہ صرف انار کھانے سے ہارٹ فیلیئر کا علاج ممکن ہے۔ تاہم نتائج سے یہ عندیہ ضرور ملتا ہے کہ انار کا استعمال جسم میں بعض مفید مرکبات کی سطح بڑھا سکتا ہے، جو دل کے افعال کے لیے فائدہ مند ہوسکتے ہیں۔

ماہرین کے مطابق ہارٹ فیلیئر کے مریضوں کو اپنی تجویز کردہ ادویات جاری رکھتے ہوئے خوراک میں کسی بھی بڑی تبدیلی یا سپلیمنٹس کے استعمال سے قبل اپنے ڈاکٹر سے مشورہ