کافی اور چائے پینے کا دماغی صحت سے تعلق، نئی تحقیق میں اہم انکشاف

اگر آپ چائے یا کافی پینا پسند کرتے ہیں تو ایک نئی تحقیق کے مطابق ان مشروبات کا معتدل استعمال بڑھتی عمر میں ڈیمینشیا کے خطرے سے تعلق رکھ سکتا ہے۔

جرنل JAMA Network Open میں شائع ہونے والی تحقیق میں ایک لاکھ 30 ہزار سے زائد افراد کے صحت سے متعلق ڈیٹا کا طویل عرصے تک جائزہ لیا گیا۔

محققین نے خاص طور پر کیفین سے بھرپور کافی اور چائے کے استعمال اور دماغی صحت کے درمیان تعلق کا جائزہ لیا۔

تحقیق میں شامل افراد کی غذائی عادات سے متعلق معلومات کئی برس کے دوران وقفے وقفے سے جمع کی گئیں۔ تقریباً 43 سالہ مشاہداتی عرصے کے دوران 10 ہزار سے زائد افراد میں ڈیمینشیا کی تشخیص ہوئی۔

محققین نے شرکا کے طرزِ زندگی اور صحت سے متعلق مختلف عوامل کو مدنظر رکھنے کے بعد دریافت کیا کہ زیادہ کیفین والی کافی پینے والوں میں ڈیمینشیا کا خطرہ نسبتاً کم پایا گیا۔ چائے کے استعمال کے حوالے سے بھی دماغی صحت کے ساتھ اسی نوعیت کا تعلق سامنے آیا۔

تحقیق کے مطابق روزانہ تقریباً دو سے تین کپ کافی یا ایک سے دو کپ چائے پینے والے افراد میں ڈیمینشیا کے کم خطرے کے ساتھ تعلق دیکھا گیا، تاہم اس سے زیادہ مقدار میں ان مشروبات کے استعمال سے خطرے میں مزید کمی کے شواہد نہیں ملے۔

محققین نے واضح کیا ہے کہ یہ تحقیق یہ ثابت نہیں کرتی کہ کیفین یا کافی اور چائے ڈیمینشیا سے بچاؤ کا سبب بنتے ہیں۔ تحقیق میں صرف ان مشروبات کے استعمال اور ڈیمینشیا کے خطرے کے درمیان ایک تعلق دیکھا گیا ہے۔