گاڑی مالکان کیلئے بڑی خوشخبری؛ ایم ٹیگ سے متعلق اہم اعلان

وفاقی دارالحکومت اسلام آباد میں گاڑیوں پر ایم ٹیگ لگوانے کی مہلت میں مزید پندرہ دن کی توسیع کر دی گئی ہے۔

ضلعی انتظامیہ کے مطابق اس فیصلے کی منظوری وفاقی وزیر داخلہ کی ہدایت پر دی گئی۔ حکام کا کہنا ہے کہ ایم ٹیگ سسٹم کا مقصد ٹریفک کی روانی بہتر بنانا اور قوانین پر مؤثر عملدرآمد کو یقینی بنانا ہے۔ اسی لیے تمام شہریوں کے لیے ایم ٹیگ لگوانا لازمی قرار دیا گیا ہے۔

ڈپٹی کمشنر اسلام آباد نے واضح کیا ہے کہ نئی آخری تاریخ اب 15 جنوری مقرر کی گئی ہے۔ اس تاریخ کے بعد بغیر ایم ٹیگ گاڑیاں چلانے والوں کے خلاف کارروائی کی جائے گی۔ ٹریفک قوانین کی خلاف ورزی پر جرمانے اور دیگر قانونی اقدامات بھی ہو سکتے ہیں۔

انتظامیہ نے شہریوں سے اپیل کی ہے کہ وہ آخری دنوں کا انتظار نہ کریں۔ قریبی ایم ٹیگ سینٹر کا رخ کریں اور مقررہ وقت میں اپنی گاڑی پر ایم ٹیگ لگوا لیں۔ اس اقدام سے نہ صرف ٹریفک نظام بہتر ہوگا بلکہ شہریوں کو روزمرہ سفر میں بھی آسانی ملے گی۔

حکام کا کہنا ہے کہ ایم ٹیگ کے ذریعے ٹولنگ، نگرانی اور ٹریفک مینجمنٹ کے نظام کو جدید بنایا جا رہا ہے۔ اس نظام سے شہر میں قانون کی پاسداری اور شفافیت کو فروغ ملے گا۔