بلوچستان؛ سیکیورٹی فورسز کی 2 کارروائیاں، 15 دہشتگرد جہنم واصل

آئی ایس پی آر کا کہنا ہے کہ سیکیورٹی فورسز نے بلوچستان میں 2 کارروائیوں کے دوران 15 دہشتگردوں کو جہنم واصل کردیا۔

پاک فوج کے شعبہ تعلقات عامہ ( آئی ایس پی آر ) کے مطابق سیکیورٹی فورسز کی بلوچستان میں 2 کارروائیوں کے دوران 15 دہشتگرد مارے گئے۔

آئی ایس پی آر کا کہنا ہے کہ ہرنائی میں خفیہ اطلاع پر کارروائی  میں 12 دہشتگرد ہلاک ہوئے، بسیمہ میں کارروائی کے دوران 3 بھارتی اسپانسرڈ دہشتگرد مارے گئے، ہلاک دہشت گردوں سے اسلحہ اور گولہ بارود بر آمد ہوا۔

آئی ایس پی آر کے مطابق ہلاک خوارج دہشتگردی کی متعدد کارروائیوں میں ملوث تھے، علاقے میں دیگر دہشتگردوں کی تلاش کیلئے کلیئرنس آپریشن جاری ہے۔

آئی ایس پی آر کا کہنا ہے کہ سیکیورٹی فورسز نے دہشتگردی کے خاتمے کیلئے آپریشن جاری رکھنے کے عزم کا اظہار کیا۔