واٹس ایپ کی سبسکرپشن پلان متعارف کروانے کی تیاری؛ کتنی رقم ادا کرنا ہوگی؟

میٹا کی جانب سے واٹس ایپ صارفین کے لیے ایک نیا سبسکرپشن پلان متعارف کروانے کی تیاری کی جا رہی ہے۔ اس نئے پلان کا نام “واٹس ایپ پلس” بتایا جا رہا ہے۔ اس کے ذریعے صارفین کو اضافی اور منفرد فیچرز تک رسائی حاصل ہوگی۔

رپورٹس کے مطابق یہ فیچر فی الحال محدود اینڈرائیڈ صارفین کے ساتھ ٹیسٹ کیا جا رہا ہے۔ اس منصوبے کا مقصد صارفین کے میسجنگ تجربے کو بہتر بنانا ہے۔ اس نئے پلان سے واٹس ایپ کی بنیادی سہولیات یا صارفین کی پرائیویسی پر کوئی اثر نہیں پڑے گا۔

واٹس ایپ پلس ایک ماہانہ سبسکرپشن ماڈل پر کام کرے گا۔ اس کا مطلب ہے کہ ایک بار سبسکرائب کرنے کے بعد یہ ہر ماہ خودکار طریقے سے رینیو ہوتا رہے گا۔ اگر صارف اس سروس کو بند کرنا چاہے تو اسے اگلی ادائیگی سے کم از کم 24 گھنٹے پہلے منسوخ کرنا ہوگا۔

قیمتوں کی بات کی جائے تو پاکستان میں اس پلان کی متوقع قیمت 229 روپے ماہانہ رکھی گئی ہے۔ دیگر ممالک میں بھی اس کی الگ الگ قیمتیں مقرر کی گئی ہیں۔ اس کے ساتھ صارفین کو ایک ماہ کا مفت ٹرائل بھی دیا جا سکتا ہے تاکہ وہ اس سروس کو آزما سکیں۔

اس سبسکرپشن کے تحت صارفین کو خصوصی اسٹیکرز تک رسائی ملے گی۔ کچھ اسٹیکرز میں اینیمیٹڈ ایفیکٹس بھی شامل ہوں گے جو چیٹ میں بھیجنے پر اسکرین پر نظر آئیں گے۔ دلچسپ بات یہ ہے کہ یہ ایفیکٹس وہ صارف بھی دیکھ سکے گا جس نے سبسکرپشن نہ لی ہو۔

اس کے علاوہ واٹس ایپ پلس میں نئے تھیمز اور کسٹم آئیکنز بھی شامل کیے جائیں گے۔ صارفین اپنی ایپ کو اپنی پسند کے مطابق تبدیل کر سکیں گے۔ ایک اور اہم فیچر یہ ہے کہ اب صارفین 3 کے بجائے 20 چیٹس کو اوپر پن کر سکیں گے۔