سست انٹرنیٹ سے پریشان پاکستانیوں کیلئے بڑی خوشخبری آگئی

پاکستان میں سیٹلائٹ انٹرنیٹ سروس کے آغاز کی تیاریاں تیز ہو گئی ہیں اور اس کے لیے ریگولیٹری فریم ورک آخری مراحل میں داخل ہو چکا ہے۔

ذرائع کے مطابق پاکستان اسپیس ایکٹیویٹیز ریگولیٹری بورڈ نے سیٹلائٹ کمیونیکیشن سے متعلق مسودہ قواعد تیار کر لیے ہیں۔ اس وقت یہ قواعد حتمی مشاورت کے مرحلے میں ہیں۔ وفاقی وزیر آئی ٹی شزا فاطمہ خواجہ نے پارلیمان میں تحریری جواب دیتے ہوئے بتایا کہ یہ فریم ورک جلد مکمل کر لیا جائے گا۔

انہوں نے کہا کہ پاکستان ٹیلی کمیونیکیشن اتھارٹی نے فکسڈ سیٹلائٹ سروسز کے لیے لائسنسنگ فریم ورک بھی تیار کر لیا ہے۔ اس فریم ورک کو منظوری کے لیے وفاقی کابینہ میں پیش کیا جائے گا۔ اس اقدام کا مقصد ملک میں سرمایہ کاری کو فروغ دینا اور شفاف نظام قائم کرنا ہے۔

نئے نظام کے تحت براڈ بینڈ سیٹلائٹ انٹرنیٹ، بیک ہال سروسز، بینڈوڈتھ کی فراہمی اور کارپوریٹ ڈیٹا سروسز فراہم کی جا سکیں گی۔ یہ سہولیات پاکستان کی ڈیجیٹل ترقی میں اہم کردار ادا کریں گی اور جدید ٹیکنالوجی کے فروغ میں مددگار ثابت ہوں گی۔

حکام کے مطابق کئی عالمی کمپنیاں پاکستان میں خدمات فراہم کرنے میں دلچسپی رکھتی ہیں۔ ان میں اسٹارلنک، ون ویب، شنگھائی اسپیس کام اور اسٹائلیوٹ شامل ہیں۔ بتایا گیا ہے کہ اسٹارلنک پہلے ہی سیکیورٹیز اینڈ ایکسچینج کمیشن آف پاکستان میں رجسٹر ہو چکی ہے۔

اس کے علاوہ اسپیکٹرم الاٹمنٹ اور لائسنسنگ کے عمل کو بہتر بنانے کے لیے متعلقہ اداروں کے درمیان رابطہ بڑھایا جا رہا ہے۔ پی ایس اے آر بی، پی ٹی اے اور فریکوئنسی الاٹمنٹ بورڈ اس حوالے سے مل کر کام کر رہے ہیں۔

وفاقی وزیر آئی ٹی کا کہنا ہے کہ سیٹلائٹ انٹرنیٹ سے ملک میں ڈیجیٹل خلیج کم ہوگی۔ خاص طور پر دور دراز علاقوں میں جہاں انٹرنیٹ کی سہولت محدود ہے، وہاں تیز رفتار انٹرنیٹ فراہم کیا جا سکے گا۔

حکومت نے دیگر بین الاقوامی کمپنیوں کو بھی ہدایت کی ہے کہ وہ قانونی تقاضے پورے کریں اور پاکستان میں رجسٹریشن کروائیں تاکہ مستقبل میں جدید انٹرنیٹ سروسز کا دائرہ مزید وسیع ہو سکے۔