کانگریس کی رکن کا ہلیری کلنٹن کی معاون کے شوہر کے پرسرار لیپ ٹاپ تک رسائی حاصل کرنے کا اعلان

ریپبلکن رکن کا کہنا ہے کہ سابق امریکی نمائندے انتھونی وینر کے بدنام زمانہ لیپ ٹاپ میں موجود فائلیں محض اتفاق نہیں بلکہ ان کے پیچھے گہرے حقائق پوشیدہ ہیں، جو امریکی سیاست کے بڑے ناموں کو بے نقاب کر سکتے ہیں۔

امریکی کانگریس کی رکن لارین بوبرٹ نے ایک حالیہ بیان میں کہا ہے کہ وہ ذاتی طور پر انتھونی وینر کے لیپ ٹاپ کی فائلیں دیکھنا چاہتی ہیں، کیونکہ ان کے خیال میں یہ فائلیں کسی بڑی سازش کا حصہ ہیں۔

یہ لیپ ٹاپ سن 2016 میں اس وقت منظر عام پر آیا تھا، جب انتھونی وینر پر ایک نابالغ لڑکی کو نازیبا پیغامات بھیجنے کے الزامات کے تحت تحقیقات جاری تھیں۔

اس لیپ ٹاپ میں انتھونی وینر کی سابقہ اہلیہ ہما عابدین کی ہزاروں ای میلز موجود تھیں، جو ہلیری کلنٹن کی انتہائی قریبی معاون رہی ہیں۔

اس ڈیوائس کی وجہ سے وفاقی تحقیقاتی ادارے یعنی ایف بی آئی کو 2016 کے صدارتی انتخابات سے چند دن پہلے ہلیری کلنٹن کی ای میلز کی تحقیقات دوبارہ کھولنا پڑی تھیں۔

یہ بھی پڑھیں : ایرانی بندرگاہوں کا مکمل محاصرہ، بارہ امریکی بحری جہاز اور سو طیارے تعینات

اگرچہ اس وقت کوئی نئے الزامات ثابت نہیں ہوئے تھے، لیکن اس لیپ ٹاپ میں ایک لاکھ 40 ہزار سے زائد ای میلز موجود تھیں، جن میں سے کچھ کلنٹن فاؤنڈیشن سے متعلق تھیں۔

لارین بوبرٹ نے اس معاملے کو ایک نیا رخ دیتے ہوئے دعویٰ کیا ہے کہ جن افسران نے ابتدائی طور پر اس لیپ ٹاپ کا جائزہ لیا تھا، ان میں سے اکثر نے مبینہ طور پر خودکشی کر لی، جس سے یہ تاثر ملتا ہے کہ ان فائلوں میں انتہائی دھماکہ خیز مواد موجود ہے۔

یہ لیپ ٹاپ طویل عرصے سے مختلف نظریات کا مرکز رہا ہے، جن میں اشرافیہ کے خفیہ نیٹ ورکس، پیزا گیٹ اور جیفری ایپسٹین کے جزیرے سے متعلق روابط کے دعوے شامل ہیں۔

بوبرٹ کا ماننا ہے کہ ان فائلوں تک رسائی حاصل کر کے وہ ان پوشیدہ حقائق کو عوام کے سامنے لا سکیں گی، جو اب تک دبائے گئے ہیں۔

ناقدین اسے سیاسی اسٹنٹ قرار دے رہے ہیں جبکہ بوبرٹ کے حامی اسے حق سچ کی تلاش کا ایک ذریعہ سمجھ رہے ہیں۔ اس لیپ ٹاپ کی فائلوں کا دوبارہ کھلنا امریکی سیاسی حلقوں میں ایک نیا تلاطم پیدا کر سکتا ہے۔