عالمی جنگ اور تباہی کا منصوبہ، امریکی کمپنی نے اے آئی ہتھیاروں کو ناگزیر قرار دے دیا

امریکی نگرانی اور مصنوعی ذہانت کی بڑی کمپنی پلانٹیر ٹیکنالوجیز نے اپنا نیا منشور جاری کر دیا ہے، جس میں اے آئی ہتھیاروں کو ناگزیر قرار دیتے ہوئے عالمی استحکام کے لیے سنگین خطرات پیدا کر دیے ہیں۔

دو سو تہتر ارب ڈالر مالیت کی امریکی کمپنی پلانٹیر نے دی ٹیکنالوجیکل ریپبلک کے عنوان سے اپنا ایک ایسا ویژن پیش کیا ہے جسے انسانیت کے لیے ایک بڑا خطرہ قرار دیا جا رہا ہے۔

یہ کمپنی پہلے ہی غزہ میں ہزاروں معصوم شہریوں کے قتلِ عام میں اسرائیل کو سافٹ ویئر فراہم کرنے اور امریکہ میں غیر قانونی تارکینِ وطن کی بڑے پیمانے پر بے دخلی کے لیے ایک ارب ڈالر کا معاہدہ کرنے کے حوالے سے بدنام ہے۔

کمپنی کے شریک بانی ایلکس کارپ نے کھلے عام اعتراف کیا ہے کہ ان کے دشمنوں کو پہنچنے والی موت اور تکلیف کا زیادہ تر سبب پلانٹیر کے تیار کردہ نظام ہیں۔

کمپنی کے منشور میں کئی خطرناک نکات اٹھائے گئے ہیں۔ سب سے پہلے، مصنوعی ذہانت پر مبنی ہتھیاروں کو ناگزیر قرار دے کر ان پر کسی بھی قسم کی عالمی پابندی کے امکان کو ختم کرنے کی کوشش کی گئی ہے۔

یہ بھی پڑھیں : ہیکرز کا اسرائیلی دفاعی نظام پر بڑا حملہ، ایٹمی اور دفاعی راز چوری

دوسرا بڑا نکتہ عوامی فوجی خدمت کی تجویز ہے، جس کے تحت ہر شہری کے بچے کو جنگ کا ایندھن بننا پڑے گا، جبکہ کمپنی کے انجینئرز محفوظ دفاتر میں بیٹھ کر ان جنگوں سے منافع کمائیں گے۔

مزید برآں، یہ منشور جرمنی اور جاپان کی جنگ کے بعد کی غیر فوجی حیثیت کو ختم کر کے انہیں دوبارہ مسلح کرنے کا مطالبہ کرتا ہے، جو گزشتہ اسی برس سے قائم عالمی امن کو تہہ و بالا کر سکتا ہے۔

سب سے زیادہ تشویشناک پہلو ثقافتی برتری کا نظریہ ہے، جس میں بعض ثقافتوں کو رجعت پسند اور ناکارہ قرار دے کر مغربی سامراجیت اور نوآبادیاتی تسلط کو جواز فراہم کرنے کی کوشش کی گئی ہے۔

پلانٹیر عالمی سطح پر ڈیٹا اکٹھا کر رہی ہے، جس تک امریکی انٹیلی جنس ایجنسیوں کو مکمل رسائی حاصل ہے، اور برطانیہ و آسٹریلیا جیسے ممالک میں عوامی صحت اور دفاع کے بڑے ٹھیکے حاصل کر کے یہ کمپنی احتساب سے بالاتر ایک ایسا عالمی نگرانی کا نظام قائم کر رہی ہے، جو انسانی حقوق کے لیے ایک ڈراونا خواب بن چکا ہے۔