ایران پر تین دن میں دوسرا امریکی حملہ، بندر عباس میں فوجی تنصیب اور ڈرونز نشانہ

امریکی فوج نے ایران کے اسٹریٹجک پورٹ سٹی بندر عباس میں ایک فوجی ٹھکانے پر نئے فضائی حملے کیے ہیں اور چار ایرانی ڈرونز کو مار گرانے کا دعویٰ کیا ہے۔

امریکی سینٹرل کمانڈ نے تصدیق کی ہے کہ اس کی افواج نے ایران کے اہم ساحلی شہر بندر عباس میں ایک فوجی تنصیب کو نشانہ بنایا ہے اور آبنائے ہرمز کے ارد گرد خطرہ بننے والے ایران کے چار خودکش حملہ آور ڈرونز کو مار گرایا ہے۔

امریکی حکام کے مطابق بندر عباس میں اس جگہ پر حملہ اس وقت کیا گیا، جب وہاں سے پانچواں ڈرون اڑانے کی تیاری کی جا رہی تھی، جبکہ ایرانی میڈیا نے بھی شہر کے مشرقی حصے میں زوردار دھماکوں کی تصدیق کی ہے۔

یہ بھی پڑھیں : ایران ٹرمپ کے دباؤ میں آکر اپنی سرخ لکیروں سے پیچھے نہیں ہٹے گا، ابراہیم عزیزی

گزشتہ تین دنوں میں یہ دوسرا موقع ہے جب امریکہ نے ایران کے اندر اہداف پر حملے کیے ہیں، تاہم امریکی فوج نے ان اقدامات کو خالصتاً دفاعی اور جنگ بندی کو برقرار رکھنے کی کوشش قرار دیا ہے۔

اس سے قبل رواں ہفتے کے آغاز پر بھی جنوبی ایران میں میزائل ٹھکانوں اور بارودی سرنگیں بچھانے والی کشتیوں پر بمباری کی گئی تھی۔ امریکی عہدیدار کا کہنا ہے کہ یہ تازہ فضائی حملے امریکی افواج اور تجارتی بحری جہازوں کے تحفظ کے لیے کیے گئے۔

دوسری جانب ایران نے ان حملوں کی شدید مذمت کرتے ہوئے اسے جنگ بندی کے معاہدے کی سنگین خلاف ورزی قرار دیا ہے اور عزم ظاہر کیا ہے کہ حکومت کسی بھی معاندانہ کارروائی کو جواب کے بغیر نہیں چھوڑے گی۔