متحدہ عرب امارات کے صدر کے اہم ترین مشیر موساد کے کارندے نکلے، ایرانی میڈیا

ایران سرکاری نیوز ایجنسی نے دعویٰ کیا ہے کہ متحدہ عرب امارات کے صدر محمد بن زاید کے ایک انتہائی بااثر مشیر سال 2015 سے اسرائیلی انٹیلی جنس ایجنسی موساد کے لیے کام کر رہے ہیں۔

ایران کی نیوز ایجنسی تسنیم نے ایک انتہائی حساس سیکیورٹی ذریعے کے حوالے سے انکشاف کیا ہے کہ متحدہ عرب امارات کے صدر محمد بن زاید کے سب سے زیادہ بااثر مشیروں میں سے ایک شخص سال 2015 سے اسرائیلی انٹیلی جنس کے ساتھ مل کر انتہائی سرگرم ہے۔

رپورٹ کے مطابق، اس اماراتی مشیر نے اپنی مخصوص سیاسی پوزیشنوں کی وجہ سے پہلی بار سال 2007 میں اسرائیلی سیکیورٹی ایجنسیوں کی توجہ اپنی طرف مبذول کروائی تھی۔

یہ بھی پڑھیں : آبنائے ہرمز سے گزرنے والے جہازوں پر سروس فیس لگائیں گے، ایرانی نائب وزیر خارجہ

اس کے بعد اسرائیل کی جانب سے اسے اپنے جال میں پھنسانے اور تعلقات استوار کرنے کی کوششیں سال 2015 میں ایک نئے اور جدید مرحلے میں داخل ہوئیں۔

سیکیورٹی ذریعے کا کہنا ہے کہ اسرائیل کے لیے اس مشیر کی اہمیت کا اندازہ سب سے پہلے اسرائیلی وزارت خارجہ نے لگایا تھا، جہاں ایک خاص سیکیورٹی یونٹ جسے ’ممد‘ کہا جاتا ہے، نے اس پورے معاملے کی قیادت کی تھی۔

اس یونٹ نے مشیر کی شناخت کرنے، اس کے ساتھ پائیدار تعلقات بڑھانے اور اس کے سیاسی مؤقف پر اثر انداز ہونے میں کلیدی کردار ادا کیا۔

رپورٹ میں مزید بتایا گیا ہے کہ سال 2018 میں اسرائیل کی بدنام زمانہ خفیہ ایجنسی موساد نے اس مشیر کی فائل کو خود سنبھال لیا اور اسی وقت سے موساد اس مشیر کے ساتھ براہ راست رابطہ برقرار رکھنے کی ذمہ دار ہے۔