پی ایس ایل 10 کا آغاز کب سے ہوگا؟ شیڈول سامنے آگیا

پاکستان کرکٹ بورڈ (پی سی بی) نے پاکستان سپُر لیگ کے 10ویں ایڈیشن کا شیڈول جاری کردیا۔

اعلامیے کے مطابق پی ایس ایل 10 جمعہ 11 اپریل سے راولپنڈی کرکٹ اسٹیڈیم میں دفاعی چیمپئن اسلام آباد یونائیٹڈ اور دو بار کی چیمپئن لاہور قلندرز کے درمیان افتتاحی میچ سے شروع ہو گی۔

ٹورنامنٹ میں 11 اپریل سے 18 مئی تک 34 میچز کھیلے جائیں گے جس میں لاہور کا قذافی اسٹیڈیم 13 میچوں کی میزبانی کرے گا جن میں دو ایلیمنیٹرز اور فائنل شامل ہیں۔

آئندہ ایڈیشن میں ایک نمائشی میچ بھی ہوگا جو 8 اپریل کو پشاور میں کھیلا جائے گا، میچ کی دونوں ٹیموں کا حتمی اعلان بعد میں ہوگا۔

پی سی بی نے کہا کہ پی ایس ایل 10 کے لیے راولپنڈی کرکٹ اسٹیڈیم 13 مئی کو کوالیفائر 1 سمیت 11 میچوں کی میزبانی کرے گا۔

اس کے علاوہ کراچی کا نیشنل بینک اسٹیڈیم اور ملتان کرکٹ اسٹیڈیم پانچ، پانچ میچوں کی میزبانی کریں گے۔

ایونٹ میں تین ڈبل ہیڈرز بھی ہوں گے جس میں دو میچ ویک اینڈ (ہفتہ) اور ایک قومی تعطیل (یوم مئی) پر ہوگا۔

کراچی کنگز 12 اپریل کو گزشتہ ایڈیشن کی رنر اپ ملتان سلطانز کے خلاف اپنی مہم کا آغاز کراچی میں کرے گی۔

ملتان سلطانز جو چھٹے ایڈیشن کی فاتح ٹیم ہے اس کا مقابلہ 22 اپریل کو لاہور قلندرز سے ہوگا، ملتان کرکٹ اسٹیڈیم میں یہ پی ایس ایل 10 کا پہلا میچ ہوگا۔

لاہور کا نو تعمیر شدہ قذافی اسٹیڈیم 24 اپریل کو ایچ بی ایل پی ایس ایل 10ویں ایڈیشن کو خوش آمید کہے گا جس میں  ساتویں اور آٹھویں ایڈیشن کی فاتح ٹیم لاہور قلندرز ہوم گراؤنڈ پر پشاور زلمی کا مقابلہ کرے گی۔

پی سی بی اعلامیے کے مطابق پشاور زلمی اپنے پانچ میچ راولپنڈی کرکٹ اسٹیڈیم میں کھیلے گی جب کہ کوئٹہ گلیڈی ایٹرز قذافی اسٹیڈیم میں پانچ میچ کھیلے گی۔