ایران نے عالمی ایٹمی ایجنسی کو خط بھیج کر امریکا کی دھمکیوں پر انتباہ جاری کردیا

ایران کے مستقل مندوب نے عالمی ایٹمی توانائی ایجنسی (IAEA) کو ایک باضابطہ خط ارسال کیا ہے، جس میں امریکی صدر ڈونلڈ ٹرمپ کی جانب سے ایران کے خلاف طاقت کے استعمال کی حالیہ دھمکیوں کے ممکنہ خطرات سے آگاہ کیا گیا۔

خط میں ایران نے واضح کیا کہ امریکی دھمکیاں نہ صرف ایجنسی کی ساکھ کو متاثر کرتی ہیں بلکہ عالمی جوہری عدم پھیلاؤ کے معاہدے (NPT) کی بنیادوں کے لیے بھی خطرہ ہیں۔ ایرانی مشن نے زور دیا کہ اس قسم کے اقدامات بین الاقوامی اعتماد کو نقصان پہنچا سکتے ہیں اور ذمہ دار عناصر کو جوابدہ ٹھہرایا جانا چاہیے۔

یہ خط امریکی صدر کی 29 دسمبر کی پریس کانفرنس کے ردعمل میں بھیجا گیا، جس میں ٹرمپ نے صیہونی وزیراعظم بنیامین نتن یاہو کے ساتھ مشترکہ بیان دیتے ہوئے ایران کے خلاف طاقت کے استعمال کے آپشن کو ابھی بھی کھلے طور پر موجود قرار دیا تھا۔

ٹرمپ نے کہا تھا کہ اگر ایران دوبارہ ایٹمی صلاحیت حاصل کرنے کی کوشش کرے گا تو واشنگٹن اس کو روکنے کے لیے سخت کارروائی کرے گا۔

ایرانی حکام نے چند گھنٹوں کے اندر سخت ردعمل جاری کرتے ہوئے واشنگٹن کے لہجے کو مسترد کیا اور اپنی خودمختاری اور قومی سلامتی کے دفاع کے ایران کے حق کو دوبارہ واضح کیا۔

خط میں ایران نے بین الاقوامی برادری پر زور دیا کہ امریکہ کی دھمکیوں کو معمول بنانا نہ صرف خطے میں کشیدگی بڑھائے گا بلکہ IAEA کی تصدیق سازی اور عالمی ایٹمی امن کی کوششوں کو بھی نقصان پہنچائے گا۔