ٹرمپ کی آبنائے ہرمز کھولنے کی کوششیں، مغربی اتحادیوں کو سخت پیغام، چین سے بھی مدد کی اپیل

امریکی صدر ڈونلڈ ٹرمپ نے خبردار کیا ہے کہ اگر اتحادی ممالک نے آبنائے ہرمز کو دوبارہ کھولنے میں امریکہ کا ساتھ نہ دیا تو اس اتحاد کو مستقبل میں سنگین نتائج کا سامنا کرنا پڑ سکتا ہے۔

امریکی صدر ڈونلڈ ٹرمپ نے خبردار کیا ہے کہ اگر اتحادی ممالک نے ایران کے خلاف جاری جنگ کے دوران آبنائے ہرمز کو دوبارہ کھولنے میں امریکہ کی مدد نہ کی تو مغربی دفاعی اتحاد کو انتہائی خراب مستقبل کا سامنا کرنا پڑ سکتا ہے۔

ایک انٹرویو میں انہوں نے کہا کہ یورپی ممالک خلیج کے تیل سے فائدہ اٹھاتے ہیں، اس لیے اس اہم سمندری راستے کو محفوظ بنانے کی ذمہ داری بھی انہیں اٹھانی چاہیے۔

صدر ٹرمپ نے موجودہ صورتحال کا موازنہ یوکرین کی جنگ کے دوران امریکہ کی جانب سے یورپ کی حمایت سے کیا اور کہا کہ امریکہ نے ہزاروں میل دور ایک تنازع میں اپنے اتحادیوں کا ساتھ دیا تھا۔ ان کا کہنا تھا کہ اب وقت آگیا ہے کہ اتحادی ممالک بھی امریکہ کے ساتھ کھڑے ہوں۔

انہوں نے واضح کیا کہ اگر اتحادی ممالک کی جانب سے مثبت جواب نہ ملا تو یہ صورتحال اتحاد کے مستقبل کے لیے انتہائی خراب ثابت ہو سکتی ہے۔

یہ بھی پڑھیں : ایران نے آبنائے ہرمز میں بارودی سرنگیں بچھائیں ہیں تو فوری ہٹا دے، ورنہ سنگین نتائج ہوں گے، ٹرمپ

امریکی صدر نے کہا کہ آبنائے ہرمز سے گزرنے والے تیل سے یورپ اور ایشیاء کے کئی ممالک کو فائدہ پہنچتا ہے، اس لیے اس راستے کی حفاظت میں انہیں بھی کردار ادا کرنا چاہیے۔

صدر ٹرمپ نے یہ بھی اشارہ دیا کہ وہ چینی صدر شی جن پنگ کے ساتھ ہونے والی اپنی مجوزہ ملاقات کو مؤخر کر سکتے ہیں، کیونکہ وہ چاہتے ہیں کہ چین بھی آبنائے ہرمز کو دوبارہ کھولنے کی کوششوں میں حصہ لے۔

انہوں نے کہا کہ اس سمندری راستے سے فائدہ اٹھانے والے ممالک کے لیے یہ مناسب ہے کہ وہ اس کی حفاظت کو یقینی بنانے میں کردار ادا کریں۔ امریکی صدر کے مطابق خلیج کے تیل پر انحصار کرنے والے ممالک کو مشترکہ کوششوں کے ذریعے اس بحران کا حل نکالنا ہوگا۔

اسی دوران عالمی توانائی کی منڈیوں میں بھی اس بحران کے اثرات واضح نظر آ رہے ہیں۔ تیل کی قیمتوں میں نمایاں اضافہ ہوا ہے اور ماہرین کے مطابق جنگ کے طول پکڑنے کی صورت میں یہ اضافہ مزید بڑھ سکتا ہے۔