امریکا کو جنگ بندی یا اسرائیل میں سے ایک راستہ چننا ہوگا، ایرانی وزیر خارجہ

ایرانی وزیر خارجہ عباس عراقچی نے کہا ہے کہ ایران اور امریکا کے درمیان جنگ بندی کی شرائط مکمل طور پر واضح اور دو ٹوک ہیں، اور امریکا کو اب فیصلہ کرنا ہوگا کہ وہ یا تو جنگ بندی کے اصول پر عمل کرے یا اسرائیل کے ذریعے ممکنہ جنگ کے راستے کا انتخاب کرے، کیونکہ دونوں چیزیں ایک ساتھ ممکن نہیں ہیں۔

عراقچی نے اپنے بیان میں مزید کہا کہ گیند اب امریکا کے کورٹ میں ہے اور عالمی برادری دیکھ رہی ہے کہ آیا امریکا اپنی کی گئی باتوں پر قائم رہتا ہے یا نہیں۔ انہوں نے زور دیا کہ صورتحال اس حد تک سنجیدہ ہے کہ کسی قسم کی ابہام یا تاخیر ناقابل قبول ہوگی۔

ایرانی پارلیمنٹ کے اسپیکر محمد باقر قالیباف نے بھی اس معاملے پر واضح موقف اختیار کیا ہے اور کہا کہ مذاکرات شروع ہونے سے قبل ہی ایران کی طرف سے پیش کی گئی 10 نکاتی تجویز کی تین شقیں مکمل طور پر نظر انداز کی جا چکی ہیں۔ قالیباف نے سوشل میڈیا پر کہا کہ جنگ بندی سے متعلق پہلی شق پر عمل نہیں ہو رہا اور مذاکرات یا جنگ بندی میں ایسی صورتحال کسی بھی طور پر مناسب نہیں۔