نیٹو سے امریکی علیحدگی کا خطرہ اور یورپ کی پریشانی

ڈونلڈ ٹرمپ کی جانب سے نیٹو کو کاغذی شیر قرار دینے اور اتحاد سے علیحدگی کی دھمکیوں کے بعد یورپ میں شدید بے چینی پھیل گئی ہے۔ یورپی ممالک اب امریکہ کے بغیر اپنے دفاع کے لیے ہنگامی منصوبے تیار کر رہے ہیں، لیکن فضائی دفاع اور جدید ہتھیاروں کے حوالے سے یورپ اور روس کے درمیان موجود فرق انتہائی تشویشناک ہے۔

ڈونلڈ ٹرمپ نے حال ہی میں ایک برطانوی اخبار کو انٹرویو دیتے ہوئے نیٹو میں امریکی رکنیت پر نظرثانی کرنے کا عندیہ دیا ہے، جس کے بعد یورپی دارالحکومتوں میں خطرے کی گھنٹی بج گئی ہے۔

اگرچہ باضابطہ طور پر نیٹو کے پاس امریکہ کے نکل جانے کا کوئی ہنگامی منصوبہ نہیں ہے، لیکن اندرونی طور پر یورپی وزارت دفاع کے حکام نے اس پر کام شروع کر دیا ہے۔

جرمنی کے نئے چانسلر فریڈرک مرز نے، جو پہلے یورپی دفاعی خودمختاری کے خلاف تھے، اب اپنا رخ بدل لیا ہے اور وہ یورپ کو دفاعی طور پر مضبوط بنانے کے حامی بن گئے ہیں۔

یہ بھی پڑھیں : امریکی پابندیوں میں نرمی کا جواب، یوکرین کا روس کی آئل ریفائنریوں پر تباہ کن ڈرون حملے

یورپی یونین نے ڈیفنس ریڈینس 2030 کے نام سے ایک روڈ میپ بھی تیار کیا ہے تاکہ فضائی دفاع اور طویل فاصلے تک مار کرنے والے ہتھیاروں کی کمی کو پورا کیا جا سکے۔

تاہم، اعداد و شمار بتاتے ہیں کہ یورپ ابھی تک روس کا مقابلہ کرنے کے لیے تیار نہیں ہے۔ روس کے پاس پورے یورپی یونین کے مقابلے میں تین گنا زیادہ فضائی دفاعی نظام موجود ہیں۔

اس کے علاوہ یورپ میں 178 مختلف اقسام کے ہتھیاروں کے نظام استعمال ہو رہے ہیں، جبکہ امریکہ صرف 30 اقسام کے نظام استعمال کرتا ہے، جس کی وجہ سے جنگی صورتحال میں تعاون مشکل ہو جاتا ہے۔

امریکہ کے پیٹریاٹ اور ایجس میزائل شیلڈز کے بغیر یورپ روس کے خلاف ہائی انٹینسٹی وار لڑنے کے قابل نہیں ہے۔ ماہرین کا خیال ہے کہ یورپ 2045 سے پہلے روس کا مقابلہ کرنے کے لیے مکمل طور پر تیار نہیں ہو سکے گا۔

اگرچہ ٹرمپ کی دھمکی کو ایک سیاسی چال بھی قرار دیا جا رہا ہے، لیکن یورپ اب مزید کوئی خطرہ مول لینے کے لیے تیار نہیں اور وہ امریکہ کے بغیر ایک متوازی دفاعی ڈھانچہ تعمیر کرنے کی کوشش کر رہا ہے۔