قرضوں میں ڈوبا امریکہ اور موقع کی تلاش میں بیجنگ، چینی دانشور کا اہم تجزیہ

چینی دانشور وو شنبو نے اپنے تجزیے میں بتایا ہے کہ کس طرح چین امریکہ کے مالیاتی، صنعتی اور اتحادی بحرانوں سے فائدہ اٹھا کر عالمی بالادستی حاصل کر سکتا ہے۔

امریکی عالمی غلبہ اب خود اس کے لیے ایک بوجھ بنتا جا رہا ہے۔ بھاری قرضے، صنعتی تنزلی اور اتحادیوں کی کمزور حمایت واشنگٹن کو مجبور کر رہی ہے کہ وہ اپنے ڈالر اور فوجی برتری کو بچانے کے لیے اپنے اہم اثاثے فروخت کرے۔

چینی سکالر وو شنبو نے اپنی ایک تازہ ترین اسٹرٹیجک رپورٹ میں واضح کیا ہے کہ چین کو اس صورتحال کا جواب کیسے دینا چاہیے۔

رپورٹ کے مطابق امریکہ اس وقت تین بڑے بحرانوں کا شکار ہے۔ پہلا مالیاتی بحران ہے جہاں قرضوں کا سود اس کی مجموعی قومی پیداوار کے پانچ فیصد سے بڑھ چکا ہے۔

یہ بھی پڑھیں : عالمی منڈی میں تیل بردار جہازوں کی قلت، چینی کارخانوں کو بڑے آرڈر موصول

دوسرا صنعتی بحران ہے جہاں امریکہ اب خام مال کے لیے دوسرے ممالک کا محتاج ہو چکا ہے۔ تیسرا بحران اتحادیوں کا ہے، جہاں فرانس اور جرمنی جیسے ممالک اب واشنگٹن کی بجائے آزادانہ فیصلے کر رہے ہیں۔

وو شنبو کی حکمت عملی یہ ہے کہ چین صرف ان شرائط پر امریکی بانڈز خریدے کہ امریکہ ٹیکنالوجی پر لگی پابندیاں ختم کرے۔

اس کے علاوہ چین کو چاہیے کہ وہ امریکی معدنیات کے ذخائر میں سرمایہ کاری کرے اور اپنے ادائیگیوں کے نظام کو وسعت دے تاکہ ڈالر پر انحصار ختم کیا جا سکے۔

تاہم وہ اثاثوں اور قوانین کے جال سے بچنے کی تنبیہ بھی کرتے ہیں۔ اس تجزیے سے واضح ہوتا ہے کہ بیجنگ اب براہ راست تصادم کے بجائے امریکہ کو مالی اور سیاسی طور پر اندر سے کمزور کر کے اس کی جگہ لینے کا ارادہ رکھتا ہے۔