میٹا نے سوشل میڈیا صارفین کو بڑی خوشخبری سنادی

سوشل میڈیا استعمال کرنے والوں کے لیے ایک اہم خبر سامنے آئی ہے۔

دنیا بھر میں رابطوں کے لیے انٹرنیٹ کا استعمال تیزی سے بڑھ رہا ہے۔ مصروف زندگی کی وجہ سے لوگ ایک دوسرے سے کم مل پاتے ہیں۔ ایسے میں سوشل میڈیا ایپس لوگوں کو جوڑے رکھنے میں اہم کردار ادا کر رہی ہیں۔

 فیس بک، انسٹاگرام، واٹس ایپ اور تھریڈز جیسی ایپس ہر عمر کے افراد میں مقبول ہیں۔ ان کا استعمال آسان ہے، اس لیے کم پڑھے لکھے افراد بھی انہیں باآسانی استعمال کر لیتے ہیں۔

اب ان ایپس کے صارفین کے لیے ایک بڑی سہولت متعارف کروائی جا رہی ہے۔ ٹیکنالوجی کمپنی میٹا نے اعلان کیا ہے کہ وہ ایک نیا مشترکہ لاگ اِن سسٹم لا رہی ہے۔ اس نئے نظام کے تحت صارفین کو ہر ایپ کے لیے الگ پاس ورڈ رکھنے کی ضرورت نہیں ہوگی۔ ایک ہی پاس ورڈ سے تمام ایپس میں سائن اِن کیا جا سکے گا۔

یہ نیا سسٹم "میٹا اکاؤنٹ” کے نام سے متعارف کروایا جا رہا ہے۔ یہ موجودہ اکاؤنٹس سینٹر کی جگہ لے گا۔ اس سے صارفین کے لیے اکاؤنٹس کو سنبھالنا آسان ہو جائے گا۔ بار بار پاس ورڈ یاد رکھنے کی مشکل بھی ختم ہو جائے گی۔ سیکیورٹی کو بھی بہتر بنانے کی کوشش کی جا رہی ہے تاکہ صارفین کا ڈیٹا محفوظ رہے۔

کمپنی کے مطابق اس فیچر کو فوری طور پر سب کے لیے جاری نہیں کیا جائے گا۔ آئندہ ایک سال کے دوران مرحلہ وار اس کو متعارف کروایا جائے گا۔ صارفین کو اپ ڈیٹس کے ذریعے اس نئی سہولت تک رسائی دی جائے گی۔