ہوا بازی کی تاریخ میں چین کا عظیم معرکہ، کاربن ڈائی آکسائیڈ سے جہازوں کا ایندھن تیار

چینی سائنسدانوں نے فضائی آلودگی کا سبب بننے والی گیس کاربن ڈائی آکسائیڈ کو براہِ راست ہوائی جہازوں کے ایندھن میں تبدیل کرنے کا کامیاب تجربہ کر لیا ہے۔

چین کے ماہرینِ تخلیقات نے ہوا بازی کی صنعت میں ایک ایسا تاریخی کارنامہ انجام دیا ہے، جو اب تک محض ایک خواب سمجھا جاتا تھا۔

شنگھائی انسٹی ٹیوٹ آف ایڈوانسڈ ریسرچ اور چائنیز اکیڈمی آف سائنسز کے سائنسدانوں کی ایک ٹیم نے لیبارٹری کی سطح سے نکل کر اب صنعتی پیمانے پر کاربن ڈائی آکسائیڈ کو براہِ راست جیٹ فیول یعنی ہوائی جہازوں کے ایندھن میں تبدیل کرنے کا راستہ دریافت کر لیا ہے۔

اس عمل کی خاص بات یہ ہے کہ یہ دہن یعنی جلنے کے عمل کو الٹ دیتا ہے، جس میں ضائع شدہ گیس پانی کے ساتھ ردِعمل ظاہر کرتی ہے اور مالیکیولز کو دوبارہ جوڑ کر توانائی سے بھرپور مائع ایندھن کی شکل دے دی جاتی ہے۔

ماضی میں اس ٹیکنالوجی کے سامنے دو بڑی رکاوٹیں تھیں، جن میں کاربن زنجیروں کی نشوونما اور قیمتی مصنوعات کی کم مقدار شامل تھی، لیکن چینی سائنسدانوں نے پوٹاشیم اور ایلومینیم سے تیار کردہ لوہے پر مبنی ایک خاص کیٹالسٹ کے ذریعے ان رکاوٹیں کو عبور کر لیا ہے۔

یہ بھی پڑھیں : چین کے تیل کے ذخائر مستحکم، توانائی کے بحران سے نمٹنے کی نئی کامیاب مثال

یہ جدید عمل محض 330 ڈگری سینٹی گریڈ کے درجہ حرارت اور معتدل دباؤ پر انجام پاتا ہے، جہاں یہ کیٹالسٹ ہر گھنٹے میں بھاری مقدار میں ایندھن پیدا کرنے کی صلاحیت رکھتا ہے۔

تجرباتی مراحل کے دوران اس سسٹم نے مسلسل آٹھ سو گھنٹے تک مستحکم کارکردگی دکھائی ہے، جو اس بات کی واضح علامت ہے کہ اب یہ ٹیکنالوجی بڑے پیمانے پر پیداوار کے لیے تیار ہے۔

ہوائی جہازوں کو پرواز کے لیے ایسی توانائی درکار ہوتی ہے، جو بیٹریاں فراہم نہیں کر سکتیں اور کھانا پکانے کے ضائع شدہ تیل جیسے متبادل اتنے وافر نہیں کہ عالمی ضرورت پوری کر سکیں لہٰذا کاربن ڈائی آکسائیڈ کا یہ راستہ ایک انقلاب ثابت ہوگا۔

چینی ماہرین کا تخمینہ ہے کہ اگلے ایک عشرے کے اندر اس ایندھن کی لاگت عام ایندھن کے برابر آ جائے گی، جس سے چین نہ صرف توانائی میں خود کفیل ہو جائے گا، بلکہ عالمی سطح پر ہوا بازی کے ایندھن کے معیار اور سپلائی چین پر بھی قابض ہو جائے گا۔

یہ پیش رفت چین کو تیل کی درآمد پر انحصار کم کرنے میں مدد دے گی، جس سے خطے کی جغرافیائی سیاست میں بیجنگ کا پلڑا مزید بھاری ہو جائے گا۔