حماس نے جنگ بندی کی تمام شرائط پوری کیں، اسرائیل نے ایک پر بھی عمل نہیں کیا، مذاکرات کار

حماس کے سینیئر مذاکرات کار کا کہنا ہے کہ حماس نے اکتوبر کی جنگ بندی کے تحت اپنے 99.9 فیصد وعدے پورے کیے جبکہ اسرائیل نے صفر فیصد عملدرآمد کیا۔

حماس کے سینیئر مذاکرات کار باسم نعیم نے ایک انٹرویو کے دوران غزہ میں جنگ بندی اور اسرائیل کے رویے کے حوالے کہا کہ حماس نے اکتوبر کی جنگ بندی کے تحت اپنے 99.9 فیصد وعدے اور ذمہ داریاں پوری کیں، جن میں تمام قیدیوں اور لاشوں کی حوالگی شامل تھی، لیکن اس کے مقابلے میں اسرائیل نے صفر فیصد عملدرآمد کیا۔

انہوں نے کہا کہ حماس کو اس تمام تر تعاون کے بدلے میں مسلسل بمباری، رفاح راہداری کی بندش اور تعمیراتی سامان کی مکمل بندش کا سامنا کرنا پڑا۔

باسم نعیم کے مطابق رفاح راہداری کو اسرائیل کی جانب سے مکمل طور پر سیل کر دیا گیا ہے، جس کے باعث غزہ کی دوبارہ تعمیر کے لیے سیمنٹ، کاروان یا شیشہ تک داخل نہیں ہونے دیا جا رہا۔

یہ بھی پڑھیں : امریکی فارمولا مسترد، اسرائیل سے تعلقات آزاد فلسطینی ریاست سے مشروط ہیں، سعودی عرب

انہوں نے بتایا کہ جنگ بندی کے نام نہاد دورانیے میں بھی اسرائیل نے 883 فلسطینیوں کو شہید کیا، جو یہ ثابت کرتا ہے کہ اسرائیل اس وقت جو کچھ کر رہا ہے، وہ ایک باقاعدہ جنگ سے کم نہیں ہے۔

ان کا مزید کہنا تھا کہ اس کے علاوہ اسرائیل نے جنگ بندی کے دوران قسام الہیڈڈ کے اہم کمانڈر کو بھی ایک کارروائی میں شہید کر دیا، جس نے مذاکرات کے عمل کو مزید پیچیدہ بنا دیا ہے، تاہم حماس نے مذاکرات کو ابھی ختم نہیں کیا۔

انہوں نے امریکی کردار پر بات کرتے ہوئے کہا کہ اسرائیلی وزیرِ اعظم نیتن یاہو کی جانب سے دوبارہ حملے شروع کرنے کا فیصلہ جاری مذاکرات کے نتائج پر نہیں بلکہ مکمل طور پر واشنگٹن کی ہری جھنڈی یعنی امریکہ کی منظوری پر منحصر ہے۔ اگر امریکہ اور اسرائیل حملہ کرنا چاہتے ہیں تو وہ مذاکرات کے نتائج کا انتظار نہیں کریں گے۔

انہوں نے واضح کیا کہ یہ ممکن نہیں کہ صرف ایک فریق کو نہتا کیا جائے جبکہ دوسرا فریق مسلسل حملے کرتا رہے، اس لیے سلامتی کے کوئی بھی اقدامات اب دونوں اطراف کے لیے یکساں ہونے چاہئیں۔