یو اے ای میں مقیم پاکستانیوں سمیت تمام رہائشیوں کیلئے بڑی خوشخبری آگئی

ابوظہبی حکام نے رہائشی اور تجارتی جائیدادوں کے کرایوں میں اضافے پر عارضی پابندی عائد کر دی ہے، جس کے بعد کرایہ داروں کو مالی دباؤ سے کچھ حد تک نجات ملنے کی توقع ہے۔

اس فیصلے سے پاکستانیوں سمیت تمام غیر ملکی اور مقامی رہائشیوں کو فائدہ پہنچے گا۔ حالیہ مہینوں میں رہائشی اخراجات میں اضافے کے باعث متعدد خاندان اور کاروباری ادارے اضافی مالی بوجھ کا سامنا کر رہے تھے۔ ایسے میں کرایوں کو موجودہ سطح پر برقرار رکھنے کا فیصلہ ان کے لیے بڑی سہولت قرار دیا جا رہا ہے۔

حکام کے مطابق کرایہ منجمد کرنے کا اطلاق نئی لیز اور پہلے سے موجود معاہدوں کی تجدید دونوں پر ہوگا۔ اس فیصلے کے بعد جائیداد مالکان موجودہ کرائے سے زیادہ رقم وصول نہیں کر سکیں گے۔ متعلقہ اداروں کو بھی ہدایت جاری کر دی گئی ہے کہ وہ اس فیصلے پر مکمل عملدرآمد یقینی بنائیں۔

سرکاری اعلامیے میں کہا گیا ہے کہ یہ حکم فوری طور پر نافذ العمل ہوگا اور اگلے نوٹیفکیشن تک برقرار رہے گا۔ اس اقدام کا مقصد رہائشیوں اور کاروباری طبقے کو معاشی استحکام فراہم کرنا اور غیر ضروری مالی دباؤ کو کم کرنا ہے۔

ماہرین کے مطابق کرایوں میں استحکام سے نہ صرف خاندانوں کے ماہانہ اخراجات قابو میں رہیں گے بلکہ چھوٹے اور درمیانے درجے کے کاروباروں کو بھی فائدہ ہوگا۔ اس فیصلے سے کاروباری سرگرمیوں کو جاری رکھنے اور سرمایہ کاری کے ماحول کو بہتر بنانے میں مدد مل سکتی ہے۔

یاد رہے کہ اس سے قبل 2021 میں کورونا وبا کے دوران بھی حکومت نے اسی نوعیت کے اقدامات کیے تھے تاکہ کاروباری اداروں اور عام شہریوں کو معاشی مشکلات سے بچایا جا سکے۔ موجودہ فیصلہ بھی اسی پالیسی کا تسلسل سمجھا جا رہا ہے، جس کا مقصد عوام کو ریلیف فراہم کرنا ہے۔