پیسکو کا بڑا فیصلہ، جمعہ کی ہفتہ وار تعطیل ختم

پشاور الیکٹرک سپلائی کمپنی (پیسکو) نے عوام کو بہتر سہولت فراہم کرنے کے لیے اہم فیصلہ کرتے ہوئے جمعہ کے روز ہونے والی ہفتہ وار تعطیل ختم کر دی ہے۔

 کمپنی کی جانب سے اس فیصلے کا باقاعدہ نوٹیفکیشن بھی جاری کر دیا گیا ہے، جس کے بعد تمام دفاتر جمعہ کے دن بھی معمول کے اوقات کار کے مطابق کام کریں گے۔

نوٹیفکیشن کے مطابق اب پیسکو کے مرکزی دفاتر، تمام فارمیشنز اور ذیلی دفاتر جمعہ کے روز بھی مکمل طور پر کھلے رہیں گے۔ تمام افسران اور ملازمین کی حاضری معمول کے مطابق ہوگی، جبکہ صارفین کے تمام دفتری معاملات بھی عام ورکنگ ڈے کی طرح انجام دیے جائیں گے۔

کمپنی انتظامیہ کا کہنا ہے کہ یہ فیصلہ فوری طور پر نافذ کر دیا گیا ہے۔ اس کا مقصد صارفین کو بہتر اور بروقت سہولیات فراہم کرنا ہے تاکہ بجلی سے متعلق شکایات، درخواستوں اور دیگر دفتری امور میں تاخیر نہ ہو۔

پیسکو نے تمام متعلقہ افسران کو ہدایات جاری کی ہیں کہ نئے احکامات پر مکمل عملدرآمد یقینی بنایا جائے۔ عوامی خدمات کے معیار کو بہتر بنانا اولین ترجیح ہے، اس لیے تمام دفاتر میں عملے کی موجودگی اور دفتری سرگرمیاں مقررہ شیڈول کے مطابق جاری رہیں گی۔