روی بشنوئی کے اوور میں 29 رنز، انگلینڈ کے جیکب بیتھل نے بھارت کے ہاتھوں سے فتح چھین لی

پہلے ٹی ٹوئنٹی میچ میں جیکب بیتھل کی دھواں دھار بیٹنگ کی بدولت انگلینڈ نے بھارت کو 4 وکٹوں سے شکست دے کر سیریز میں 1-0 کی برتری حاصل کر لی۔

مانچسٹر کے اولڈ ٹریفورڈ کرکٹ گراؤنڈ پر کھیلے گئے دوسرے ٹی ٹوئنٹی انٹرنیشنل میچ میں انگلینڈ نے جیکب بیتھل کی شاندار اور جارحانہ بیٹنگ کی بدولت بھارت کو دلچسپ مقابلے کے بعد 4 وکٹوں سے ہرا دیا ہے۔

بھارت نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 190 رنز بنائے اور انگلینڈ کو 191 رنز کا ہدف دیا۔

ایک وقت پر انگلینڈ کی ٹیم 133 رنز پر 5 وکٹیں گنوا کر شدید دباؤ میں تھی اور اسے آخری 28 گیندوں پر 58 رنز درکار تھے۔

ایسے میں جیکب بیتھل نے جارحانہ رخ اختیار کیا اور بھارتی اسپنر روی بشنوئی کے ایک ہی اوور میں 3 چھکوں اور 2 نو بالز کی مدد سے 29 رنز بٹور کر میچ کا نقشہ بدل دیا۔

یہ بھی پڑھیں : کائلان ایمباپے کا پینالٹی گول، فرانس پیراگوئے کو ہرا کر کوارٹر فائنل میں پہنچ گیا

بیتھل 46 گیندوں پر 76 رنز بنا کر ناقابلِ شکست رہے اور انگلینڈ نے ہدف ایک اوور قبل ہی حاصل کر لیا۔ بھارت کی جانب سے ارشدیپ سنگھ نے 40 رنز دے کر 3 وکٹیں حاصل کیں۔

اس سے قبل بھارت کی اننگز کا آغاز تاریخ ساز رہا کیونکہ 15 سالہ نوجوان بلے باز ویبھو سوریا ونشی نے اپنا انٹرنیشنل ڈیبیو کیا، جس کے ساتھ ہی وہ سچن ٹینڈولکر کا ریکارڈ توڑ کر بھارت کی نمائندگی کرنے والے تاریخ کے سب سے کم عمر کھلاڑی بن گئے۔

سوریا ونشی نے 10 گیندوں پر 2 چھکوں کی مدد سے 14 رنز بنائے۔ بھارت کی جانب سے ابھیشیک شرما نے 24 گیندوں پر 43 رنز کی تیز رفتار اننگز کھیلی جبکہ ایشان کشن نے 49 رنز بنائے، اور آخر میں تلک ورما کی جارحانہ بیٹنگ نے ٹیم کا اسکور 190 تک پہنچایا۔

انگلینڈ کی جانب سے سیم کرن نے 33 رنز دے کر 3 وکٹیں لیں۔ انگلینڈ کی اننگز کے آغاز میں ارشدیپ نے دونوں اوپنرز کو صفر پر آؤٹ کر دیا تھا، لیکن ہیری بروک کے 15 گیندوں پر 39 رنز کی بدولت انگلینڈ میچ میں واپس آیا اور آخر میں بیتھل نے فتح دلائی۔