اسپین نے پرتگال کو 1-0 سے ہرا کر فیفا ورلڈکپ چیمپیئن بننے کی دوڑ سے باہر کردیا

اسپین نے فٹ بال ورلڈ کپ کے اہم میچ میں پرتگال کو 1-0 سے شکست دے کر کوارٹر فائنل کے لیے کوالیفائی کر لیا ہے۔

پرتگال اور اسپین کے درمیان کھیلے گئے فٹ بال ورلڈ کپ کے سنسنی خیز مقابلے میں اسپین نے میچ کے آخری لمحات میں 1-0 سے فتح حاصل کر لی ہے۔

میچ کے دوسرے ہاف کے اضافی وقت کے پہلے ہی منٹ میں مائیکل میرینو نے شاندار گول کر کے پرتگال کو ٹورنامنٹ سے باہر کر دیا اور اس شکست کے ساتھ ہی فٹ بال کے شہرہ آفاق کھلاڑی کرسٹیانو رونالڈو کا ورلڈ کپ کیریئر ممکنہ طور پر ختم ہو گیا ہے۔

یہ بھی پڑھیں : سری لنکا اور ویسٹ انڈیز ٹیسٹ میچ سنسنی خیز مرحلے میں داخل، سری لنکا کو 142 رنز کی برتری

مائیکل میرینو، جو کہ 85 ویں منٹ میں متبادل کھلاڑی کے طور پر میدان میں آئے تھے، نے فاؤل کے بعد تیزی سے فری کک لی اور فیران ٹورس کے پاس پر گول کیپر ڈیوگو کوسٹا کو چکاتے ہوئے گیند کو نیٹ میں پہنچا دیا۔

سال 2010 میں جنوبی افریقہ میں ورلڈ کپ جیتنے کے بعد اسپین پہلی بار کوارٹر فائنل میں پہنچا ہے، جہاں اس کا مقابلہ جمعہ کو لاس اینجلس اسٹیڈیم میں ہوگا۔

دوسری جانب، 41 سالہ رونالڈو کا مسلسل دوسری بار پرتگال کو کوارٹر فائنل میں پہنچانے کا خواب ادھورا رہ گیا، وہ دنیا میں سب سے زیادہ 146 انٹرنیشنل گول اور 233 میچ کھیلنے کا ریکارڈ رکھتے ہیں۔

اس میچ میں ہسپانوی گول کیپر انائی سیمون نے شاندار کارکردگی دکھائی اور ورلڈ کپ میں مسلسل 6 میچوں میں کوئی گول نہ کھا کر 609 منٹ تک کلین شیٹ رکھنے کا نیا ورلڈ ریکارڈ قائم کر دیا، انہوں نے اٹلی اور سوئزرلینڈ کے پرانے ریکارڈز کو بھی توڑ دیا ہے۔