کتاب پڑھنے سے دماغی صحت پر کیا اثر پڑتا ہے؟ نئی تحقیق میں اہم انکشاف

اگر آپ اپنی دماغی صحت کو بہتر رکھنا چاہتے ہیں تو کتاب پڑھنے کی عادت اس سلسلے میں مددگار ثابت ہوسکتی ہے۔

ایک نئی تحقیق میں مطالعے اور دماغی صحت کے درمیان مثبت تعلق کی نشاندہی کی گئی ہے۔

جرنل Psychological Medicine میں شائع ہونے والی تحقیق کے مطابق کتابیں پڑھنے سے نہ صرف دماغی افعال بہتر ہوسکتے ہیں بلکہ شخصیت پر بھی مثبت اثرات مرتب ہوتے ہیں۔ محققین کے مطابق کم عمری میں مطالعے کی عادت اپنانے کے اثرات بعد کی زندگی میں بھی دیکھے جا سکتے ہیں۔

امریکا میں تقریباً 10 ہزار بچوں کے ڈیٹا پر ہونے والی تحقیق میں دریافت کیا گیا کہ وہ بچے جو بچپن میں تفریح کے لیے کتابیں پڑھنا شروع کرتے ہیں، ان میں بعد کی زندگی میں دماغی صحت اور ذہنی کارکردگی سے متعلق کئی مثبت خصوصیات دیکھی جاتی ہیں۔

تحقیق کے مطابق بچپن سے مطالعے کی عادت رکھنے والے افراد میں دماغی صحت سے متعلق مسائل کی علامات نسبتاً کم ہوسکتی ہیں، جبکہ ان کے دماغی افعال بہتر ہونے کے ساتھ ساتھ نیند کے دورانیے اور تعلیمی کارکردگی میں بھی بہتری دیکھی گئی۔

تاہم مطالعے کے فوائد صرف بچوں تک محدود نہیں۔ بالغ افراد کے حوالے سے بھی تحقیق میں بتایا گیا کہ کتابیں پڑھنے کا شوق تنہائی کے احساس کو کم کرنے میں مدد دے سکتا ہے۔ ایسے افراد دوسروں کے نقطۂ نظر کو سمجھنے میں بھی بہتر کارکردگی کا مظاہرہ کرسکتے ہیں۔

محققین کے مطابق مطالعہ ذہنی دباؤ کم کرنے اور توجہ مرکوز رکھنے میں بھی معاون ثابت ہوسکتا ہے۔ تحقیق میں یہ بھی بتایا گیا کہ جو افراد ہفتے میں کم از کم ایک مرتبہ مطالعہ کرتے ہیں، ان میں اگلے 14 برس کے دوران دماغی تنزلی کے کم خطرے کے ساتھ تعلق دیکھا گیا۔

محققین کا کہنا ہے کہ مطالعے سے فائدہ اٹھانے کے لیے کسی شخص کا زیادہ تعلیم یافتہ یا صاحبِ ثروت ہونا ضروری نہیں۔ کتاب پڑھنے کی باقاعدہ عادت دماغی افعال، ذہنی صحت اور شخصیت کے مختلف پہلوؤں کے لیے مفید ہوسکتی ہے۔

تاہم ایسی تحقیق سے یہ ثابت نہیں ہوتا کہ کتاب پڑھنا لازماً دماغی تنزلی یا دیگر ذہنی مسائل سے بچاؤ کا سبب بنتا ہے، بلکہ یہ مطالعے اور بہتر ذہنی صحت کے درمیان تعلق کی نشاندہی کرتی ہے۔