ایران نے آبنائے ہرمز میں ایک اور امریکی زیر آب ڈرون قبضے میں لے لیا

پاسداران انقلاب کے ترجمان نے آبنائے ہرمز میں ایک اور جدید امریکی زیر آب ڈرون پکڑے جانے کو ایک بڑی انٹیلی جنس کامیابی قرار دی ہے۔

پاسداران انقلاب کے ترجمان بریگیڈیئر جنرل حسین محبی نے سوشل میڈیا پر جاری اپنے بیان میں اس بات پر زور دیا کہ اسٹریٹجک آبی گزرگاہ آبنائے ہرمز پر تہران کا کنٹرول مضبوط ہے اور یہ غیر ملکی فوجی اثاثوں کے لیے ایک جال بن چکی ہے۔

انہوں نے بتایا کہ تازہ ترین پکڑا جانے والا ڈرون ایک انتہائی جدید خودکار زیر آب گاڑی ہے، جو نفیس سونار اور درست نیویگیشن سسٹمز سے لیس ہے۔

یہ بھی پڑھیں : آبنائے ہرمز ایرانی کنڑول میں ہے، امریکی بیانیے اور حقیقت میں واضح تضاد ہے، ایرانی اسپیکر

حسین محبی نے مزید کہا کہ یہ صرف ایک ضبطگی نہیں بلکہ یہ ایک قیمتی انٹیلی جنس انعام ہے، جو خطے میں امریکی جاسوسی کارروائیوں کا پردہ فاش کر دے گا۔

ایرانی بحریہ کے مطابق یہ کارروائی انٹیلی جنس نگرانی اور الیکٹرانک وارفیئر پر مشتمل ایک مربوط اور پیچیدہ آپریشن کے نتیجے میں عمل میں آئی۔

یہ امریکی ڈرون آبنائے ہرمز میں جاسوسی کی غرض سے سرگرم تھا اور اب ایرانی ماہرین کے پاس موجود ہے تاکہ اس کے ڈیٹا کو ریکور اور تجزیہ کیا جا سکے۔

اس ڈرون کے محفوظ قبضے میں آنے سے ایرانی ماہرین کو اس کے خفیہ ڈیٹا اور سنسرز تک رسائی حاصل ہو گئی ہے، جو ایران کی دفاعی صلاحیتوں کو مزید مضبوط کرے گی۔