’’میں تمہیں قتل کرنا چاہتا ہوں، پھانسی دینا چاہتا ہوں‘‘ اسرائیلی وزیر بن گویر کی فلسطینی قیدی حسن سلامہ کو کھلی دھمکی

مقبوضہ فلسطین: اسرائیلی قومی سلامتی کے وزیر ایتمار بن گویر کی ایک ویڈیو سامنے آئی ہے جس میں وہ فلسطینی قیدی حسن سلامہ کے سامنے کھڑے ہوکر انہیں قتل کرنے اور سزائے موت دینے کی بات کرتے دکھائی دیتے ہیں۔

بن گویر نے یہ ویڈیو اپنے سوشل میڈیا اکاؤنٹ پر جاری کی، جس میں وہ مسلح اور نقاب پوش اہلکاروں کے ہمراہ جیل کی کوٹھڑی میں حسن سلامہ کے سامنے موجود ہیں۔

סגירת מעגל ענקית עבורי!

כנער עמדתי ברחובות והפגנתי אחרי פיגועי התופת הנוראיים בקו 18 בירושלים. עשרות חפים מפשע נרצחו, ומשפחות שלמות נחרבו.

לפני כשבועיים הגעתי לכלא ופגשתי פנים אל פנים את הארכי מחבל חסאן סאלמה – מבכירי חמאס, חברו ושותפו של יחיא סינוואר ימ״ש, שנשלח בידי הצורר מוחמד דף ימ״ש ליהודה ושומרון לארגן את אותם הפיגועים באוטובוסים.

אמרתי לו שהנער שהפגין אז ברחובות הוא היום השר לביטחון לאומי והסתכלתי לשטן בעיניים. הוא רעד והיה מבוהל – ויש לו סיבה טובה.

כשר לביטחון לאומי הובלתי מדיניות שהפכה את חייו לגיהנום. ובעזרת ה׳, כשר הביטחון, אפעל לכך שמחבלים רוצחים כמוהו יוצאו להורג, ואקדם את מדיניות ההגירה מעזה ומיהודה ושומרון.

— איתמר בן גביר (@itamarbengvir) September 27, 2026

ویڈیو میں بن گویر قیدی کو مخاطب کرتے ہوئے کہتے ہیں کہ وہ انہیں قتل کرنا اور سزائے موت دینا چاہتے ہیں۔ اسرائیلی وزیر کے مطابق یہ ملاقات تقریباً دو ہفتے قبل جیل میں ہوئی تھی۔

بن گویر نے ویڈیو میں جیل میں فلسطینی قیدیوں کو دی جانے والی سہولیات اور حالات کا بھی ذکر کیا اور انہیں اپنی اختیار کردہ پالیسی سے جوڑا۔

فلسطینی قیدیوں سے متعلق اداروں نے بن گویر کے بیان کی مذمت کرتے ہوئے اسے زیر حراست قیدی کے خلاف براہ راست دھمکی قرار دیا ہے۔ حماس نے بھی اس اقدام کی مذمت کرتے ہوئے اسے فلسطینی قیدیوں کے لیے مزید خطرات کی علامت قرار دیا۔

حسن سلامہ کا تعلق غزہ کے علاقے خان یونس سے ہے اور وہ حماس کے عسکری ونگ عزالدین القسام بریگیڈز سے وابستہ رہے ہیں۔ انہیں اسرائیلی فورسز نے 1996 میں الخلیل سے گرفتار کیا تھا۔

اسرائیلی عدالت نے انہیں 1990 کی دہائی میں ہونے والے متعدد حملوں سے متعلق مقدمات میں مجرم قرار دیا اور 48 مرتبہ عمر قید سمیت طویل قید کی سزا سنائی۔ اسرائیلی حکام انہیں 1996 میں ہونے والے ایسے حملوں کا ذمہ دار قرار دیتے ہیں جن میں متعدد اسرائیلی ہلاک ہوئے تھے۔

حسن سلامہ تقریباً 30 برس سے اسرائیلی جیلوں میں قید ہیں اور فلسطینی قیدیوں کے حقوق سے متعلق تنظیموں کے مطابق اس عرصے کا ایک بڑا حصہ انہوں نے تنہائی کی قید میں گزارا۔

بن گویر نے ویڈیو کے ساتھ اپنے بیان میں کہا کہ اگر وہ آئندہ اسرائیلی وزیر دفاع بنتے ہیں تو فلسطینی قیدیوں کے لیے سزائے موت پر عمل درآمد اور غزہ و مقبوضہ مغربی کنارے سے فلسطینیوں کی نام نہاد ’’رضاکارانہ ہجرت‘‘ کی پالیسی کو آگے بڑھانے کی کوشش کریں گے۔

فلسطینی اور عرب ممالک ایسی نقل مکانی کی تجاویز کو مسترد کرتے رہے ہیں۔

یہ ویڈیو ایسے وقت سامنے آئی ہے جب فلسطینی قیدیوں کے لیے سزائے موت کا معاملہ اسرائیلی سیاست میں زیر بحث ہے۔ رواں سال مارچ میں اسرائیلی پارلیمنٹ نے مخصوص مقدمات میں فلسطینی قیدیوں کو سزائے موت دینے سے متعلق قانون منظور کیا تھا، جس کی بن گویر اور ان کی جماعت نے حمایت کی۔

تاہم اب تک اس قانون کے تحت کسی فلسطینی قیدی کو سزائے موت دیے جانے کی اطلاع نہیں ہے۔